Ing. Carlos Bermudez (AVP):
*A pidi informacion concreto for di Fundacion FUTURA, atraves di Minister
ORANJESTAD (AAN): Parlamentario Ing. Carlos Bermudez ta enfatisa cu ya pa algun aña nos ta scucha tocante e desaroyo di proyecto(nan) relaciona cu e-Government. Varios stapnan a wordo tuma pa eventualmente implementa un plataforma digital pa integra e servicionan gubernamental na Aruba, conoci como CONEXION.
E plataforma aki ta basa riba e modelo X-Road di Estonia (https://e-estonia.com/story/), un sistema cu a pone e pais na un posicion di liderazgo mundial den digitalisacion di servicionan publico.
-Importancia di transparencia y necesidad di aceleracion
Tumando na cuenta e gran importancia cu e-Government tin pa un sistema gubernamental moderno, eficiente y accesibel pa tur ciudadanonan, Parlamentario Bermudez ta di opinion cu a yega e momento pa trata e proyecto cu mas atencion y cu mas prioridad. Pa e motibo aki, e a dirigi un serie di pregunta por escrito na Minister di Innovacion, señora mr. Gerlien Croes, pa haya claridad riba:
- E fondo total di 14.5 miyon florin cu, segun informacion, Fundacion FUTURA a haya den e ultimonan añanan;
- E fondo di 14.2 miyon euro cu a wordo aproba na 2024 pa Union Europeo, destina pa finalisacion di e proyecto e-Government.
-Solicitud pa claridad
Parlamentario Bermudez ta desea di haya informacion concreto for di Fundacion FUTURA, atraves di Minister, riba entre otro:
- Unda Aruba ta actualmente den e proyecto di e-Government;
- Cual proyecto (sub-proyecto) of producto ta den fase di inicio, den ehecucion of finalisa;
- Kico ta e plan concreto pa e añanan benidero;
- Y kico ta e rol di cada instancia\departamento pa cu maneho, instalacion, legalisacion, mantencion di e plataforma digital etc. etc.
-Suplica
“Aruba no por warda mas. Nos ta kedando atras pa loke ta trata servicionan digital. Nos pueblo merece un aparato gubernamental eficiente y moderno, y e-Government ta un metodo importante pa logra esaki.”
- Ban uni forsa pa logra e meta.
E preguntanan a wordo presenta na Minister Croes por escrito, y Parlamentario Bermudez ta spera un contesta formal y completo den mesun forma.
