ORANJESTAD (AAN) – Hendrik Tevreden, Presidente di e Comision di Onderzoek geloofsbrieven en toelating als leden der Staten, a hiba palabra den Parlamento y a gradici Presidente di Staten mr. Ady Thijsen,
e honor cu nan a sinta na mesa durante e ceremonia di despedida di e Parlamento cu a sinta den e periodo 2017-2021, cu a tuma lugar Diaranzon y entrega di credencialnan na e parlamentarionan nobo cu lo huramenta awe.
Tevreden a menciona cu el a ricibi e lista di personanan for di Censo pa bira Parlamentario, y nan tur a acepta esaki tambe, y tur credencial a wordo entrega por completo.
Treveden a menciona tur e nombernan y nan ta:
Miguel Mansur, Marisol Lopez- Tromp, Aquannette Gunn, Evelyna Wever- Croes, Xiomara Maduro, Dangui Oduber, Glenbert Croes, Rocco Tjon, Arthur Vallejo, Hendrik Tevreden, Endy Croes, Edgard Vrolijk, Michiel Eman, Mike de Meza, Arthur Dowers, Gerlin Croes, Oslin Benito Sevinger, Raycond Santos Do Nacemento, Mervin Wyatt-Ras, Ursell Arends y Geoffrey Wever.
Hendrik Tevreden a conclui bisando: “Cu esaki nos a termina nos trabao y mi ta gradici Presidente di Staten pa e oportunidad aki, y ta desea hopi exito na tur esnan cu ta huramenta Diahuebs, y tambe mi ta probecha e oportunidad pa gradici e ex-coleganan cu kizas nos no ta bay mira mas den e Parlamento nobo, pa nan esfuerzo, valentia, dedicacion, trabao duro cu nan a dedica na pais Aruba. Mi ta kere cu tabata temponan sobre humano y dificil, pero nan a duna di nan parti; tempo di nan mes y nan famia nan a entrega Aruba y para mi tabata un placer di por a colabora y traha hunto cu nan. Y mi ta desea nan hopi exito den futuro, cu tur cos bay bon pa nan tambe”, señor Tevreden a conclui.
Seguidamente, presidente di Staten mr. Ady Thijsen a gradici Hendrik Tevreden, como Presidente di e Comision, y tambe na Alan Howell y Marlon Sneek, pa e trabao cu nan a eherce.
“Mi kier a felicita tambe tur e miembronan cu a wordo menciona cu ta bay drenta Parlamento. Pabien na bosonan”, el a expresa cerando e punto 2 di agenda na e momento ey, y a haci un pause pa despues sigui cu puntonan 3 y 4 di agenda.
