Cristian Soto tambe ta retira di partido Accion21

E ta alega entre otro, midimento di poder - ORANJESTAD (AAN): E tension y inestabilidad a sigui crece den e partido politico nobo Accion21.

No ta solamente Leonardo Figaroa y Daphne Lejuez a retira, pero awor un di tres miembro, Cristian Soto tambe a haci oficial su retiro pa medio di un carta emiti diaranson.

E carta ta bisa lo siguiente: 

Partido Politico Accion 21
Attn: Partijraad & Directiva LG Smith Blvd. 120
Oranjestad, Aruba
Topico: Retiro

Apreciabel miembronan di Partijraad y Directiva,
Mediante e carta aki mi persona ta anuncia retiro cu efecto inmediato for di partido Accion 21.
Desde 1 di juli mi persona den e chatgroup di e partido a anuncia cu mirando kico tur ta pasando na e momento ey, cu tin un division pisa den e partido, hopi wega di redo, midimento di poder y buscamento di beneficionan personal, ta distancia di tal chatgroup.

Manera mi a comunica, mi a pidi un reunion cu lider di e partido, sr. Miguel Mansur pa wak kico lo ta e siguiente paso.
            Durante e reunion cu sr. Mansur, dia 2 di juli, mi a bis'e cu mi lo bay den un posicion 'non actief, sperando desaroyonan interno y pa wak con esaki lo ser maneha.

Lastimamente mi mester bisa cu despues di declaracionnan haci door di sr. Mansur den prensa, el a bira cla pa mi cu un liderasgo di division, di kier demostra poder extremo y di ego, no ta algo cu mi lo por forma parti di dje.

Desde prome reunion mi tabata hopi cla cu mi lealtad ta na Pais Aruba y no na un partido. Mi semper lo bisa e cosnan manera cu mi ta waknan y pami un lider ta unifica, guia y pusha pa bay dilanti manera un team. E ta traha pa 'nos' y no pa 'mi'.
            Mi ta termina cu un quote cu casualmente mi a lesa di un miembro di partido y e ta bisa: "Integrity is holding to our convictions regardless of the consequences and never compromising our ideals or values, even if it affects the bottom line".

Atentamente,

Cristian Soto Garcia

Soto tabata number 4 riba lista di Accion21 y durante eleccion 2021 el a haya 144 voto.