ORANJESTAD (AAN) -- E lider di fraccion di RED, Ricardo Croes ta sinti su mes honra di a forma parti di Parlamento, durante e periodo 2017-2021.
“Mi ta kere cu delaster un persona cu haya oportunidad di sirbi nan pais, den e Organo di mas halto, e ta un honor y pa mi e no ta diferente.
Mi ta spera cu pueblo di Aruba por a realiza cu no ta algo facil. Eleccion mes a caba di mustra cu mi ta bay cas; mi no tin problema cu esaki “at all”. Mi ta cana cu frenta den laira. Mi a haci mi trabao integro, honesto, publico. Tur mi declaracionnan a wordo haci den Parlamento di Aruba, y ni un momento so mi persona a para pa interes propio, of interes di partido politico.
Mi a para akiden pa interes general, y nos a paga un prijs pa nos ideal, y e prijs ey mi lo pague atrobe. E experiencia ta uno unico y naturalmente, bo no por pasa un experiencia como parlamentario ni un otro caminda, sino den un Parlamento. Y mi ta desea e parlamento nobo sabiduria, forza y cu Papa Dios bendiciona e Parlamento aki”, Ricardo Croes a expresa.
E ex-parlamentario a bisa cu e no ta kere cu Partido RED ta laga algo atras den forma di ley of di mocion. “Tur hende cu a sigui e reunionnan publico mester por realiza cu un parlamentario su so, no por laga net net nada atras. Ni si tabata tin un acuerdo di gobernacion, esey no a pone cu nos coleganan di coalicion a sa di respeta esaki, ora mi persona tabata presenta mocionnan. Kiermen, laga mi ta laga un experiencia atras cu por pasa cu un partido chikito, ora cu e ta forma parti di un coalicion unda cu e no ta parti di e poder. Sigur e dos ultimo añanan mi persona tabata e di 12 asiento, caminda cu 11 ta suficiente; y ora cu mi a haya e yabi manera nan ta bisa, nos a haye cu un responsabilidad grandi cu yama crisis nacional, crisis den Reino, crisis mundial. Y nos a sa di carga e responsabilidad aki dignamente. E ta imposible pa pretende cu un gobierno no ta instabil den momento di crisis asina”, Ricardo Croes a subraya.
