Ta hopi importante pa tene na cuenta cu Aruba su capacidad di carga

Lider di Fraccion di AVP, Jennifer Arends-Reyes:

ORANJESTAD (AAN)-- Parlamentario Jennifer Arends- Reyes, lider di Fraccion di Partido AVP, a señala den entrevista cu Matutino DIARIO, cu ta hopi importante pa tene cuenta cu e aspecto di capacidad di carga di nos pais.

“Nos tin diferente punto tambe, unda cu nos como Comision a sinta cu ATA pa varios ora, unda nos a scucha nan plan pa 2026 y tambe nos a bay na Triple A, na e parti di aeropuerto unda e capacidad eynan ta bay wordo limita.

“Nos por wak tambe cu na momento cu nos a papia cu ATA nan a indica cu e parti di crecemento nan ta keda mantene un poco stabil. Na momento cu bo ta wak tambe e parti geopolitica, caminda cu nos ta bisa cu awo den e prome cuartal, casi nos  por bisa cu nos a pas’e, pero nos no sa ki ta bay bin”, Jennifer Arends- Reyes a indica.

Segun e parlamentario, aworaki tin e parti di beachnan unda ATA a indica cu tambe nan ta trahando riba dje, den e parti di Bushiri, cu lo por drech’e tambe pa e por wordo uza di parti di crusero, y esaki ta e idea tambe. “Y akinan tin varios aspecto cu nos mester tene cuenta cu esakinan. Na e momentonan aki, nos por bisa cu nos ta wak e parti di capacidad pero nos mester tambe, tene na cuenta cu otro diferente aspecto”, Parlamentario Arends-Reyes a señala.

E dama a referi tambe na Eagle Beach, y a bisa cu esaki ta un punto cu sigur, di parti di su persona y di e comision, tin na bista e aspecto di Beach Policy, unda nan ta enfoca tambe riba Airbnb.

“Nos tin pensa di yama e ministernan encarga cu esaki pa tambe duna un splicacion kico ta e plannan. Nos a scucha den media cu nan ta bezig cu e parti di Beach Policy, y e ta importante”, Arends-Reyes a señala.

Segun e parlamentario ta importante pa nan keda den e parti aki di combersacion y dialogo cu tur e stakeholders. El a subraya cu Eagle Beach ta un di e top beachnan di Aruba, reconoci internacionalmente, y nos mester cuid’e.