Parlamentario Shailiny Tromp-Lee:
ORANJESTAD (AAN): E reaccion di e partido AVP y su liderazgo riba e sentencia definitivo di Hoge Raad den e caso contra un ex-minister ta profundamente preocupante. Shailiny Tromp-Lee di MEP, a declara riba esey: “Como representante di pueblo, mi no por keda keto ora ta trata di delitonan serio manera oplichting di nos Pais, omkoping y verduistering. Esakinan no ta "asuntonan politico," sino actonan cu a causa daño directo na e confianza di nos pueblo y na e integridad di nos Estado di Derecho.”
En bes di asumi un posicion di madurez, nos ta mira un intento pa suavisa e gravedad di e condena aki. Pio ainda, ta lansa insinuacionnan sin base contra nos Ministerio Publico, tratando di mina e mesun sistema hudicial cu ta proteha nos tur. Esaki no ta e caminda pa un liderazgo cu ta bisa di kier bon pa Aruba.
“Mi kier ta hopi cla: e proceso aki a cana su caminda na tur instancia legal di mas halto cu nos conoce. Ora e tribunal di mas halto dicta un decision definitivo, e no ta "persecucion," sino husticia cu a cumpli su curso.”
“Mi ta haci un yamado serio y directo na e lider di AVP, Sr. Mike Eman: Un lider tin e responsabilidad di carga e pasonan di su partido, specialmente den momentonan di berguensa pa nos pais. Liderazgo real ta exigi e curashi pa bisti e carson di responsabilidad, stop e narativa di victimisacion, y acepta cu locual a sosode tabata un fayo grave contra e integridad di e pais aki.”
Tromp-Lee a finaliza bisando: Aruba merece transparencia y un liderazgo cu ta respeta nos institucionnan, no un cu ta purba sconde tras di excusa ora e berdad no ta cumbini nan.
