ORANJESTAD (AAN) — Hendrik Tevreden, Parlamentario di fraccion di MEP, a hiba palabra den e conferencia di prensa di su fraccion, Diaranzon mainta.
Pa cuminza el a elabora riba e forma di bishita famianan door di e candidatonan di MEP, wardando tur regla protocolar pa proteha di Covid-19 y haci un yamada na tur su coleganan di partido sigui haci esaki.
E parlamentario a bisa cu e candidatonan riba lista di MEP ta purba haya mas tanto informacion posible, y ta trata di bishita mas cas di famia cu nan por, pa haya sa cual ta e puntonan di preocupacion den pueblo, pa pone mas atencion riba esakinan.
Tevreden a menciona cu partido MEP ta haciendo su maximo esfuerzo pa mantene orden den su campaña, bishitando casnan cu mondkapje bisti, y acercando hende teniendo cuenta cu tur e reglanan di precaucion pa Covid-19.
E parlamentario a haci un peticion na tur candidato di Partido Movimento Electoral di Pueblo, pa sigui mantene nan mes riba e protocolnan, cuida nan mes di e riesgonan di e pandemia pa asina aki, por termina e ultimo luna aki di campaña pa eleccion parlamentario, na un bon forma.
