ORANJESTAD (AAN): Parlamentario mr. Edgard Vrolijk (MEP) ta indica cu partido MEP e siman cu a pasa a lansa su programa di gobernacion pa 2021-2015.
Pueblo por subi riba e website www.mep.aw y cada ciudadano por lesa pa su mes un programa ambicioso pero realistico cu lo yuda Aruba sigui cu e recupracion despues di e crisis di Covid.
Den e programa di MEP a dedica un seccion na Enseñansa bao di e titulo: “SIÑA BON AWE PA COSECHA MAÑAN”, cu ta e muestra cu Awo Ta Su Ora pa inverti y mehora nos educacion pa hunto nos por cosecha e bon frutonan den futuro y den esaki sigur mester sigui inverti den innovacion den enseñansa, sostene y duna e maestro tur herment necesario pa e por haci su trabao y sigur aplica e 21st century skills pa educacion.
Sigui inverti den innovacion
Bao Gabinete Evelyn Wever-Croes a cuminsa cu e proceso di innovacion cu e Proyecto di E-learning. Den cuadro di esaki a logra cu un presupuesto hopi limita a yega caba na inverti den innovacion den e scolnan di Cacique Macurima, Cacique Aterima, Pastoor kranwinkel y muy pronto un otro scol mas lo ser converti den un scol innovativo.
E concepto aki bao un proximo gobernacion lo ser acelera pero sigur den esaki lo enfoca riba e upgrading di docentenan y tambe den trece cambionan cu ta bay cu e desaroyo aki pa locual ta trata curiculo escolar.
Duna sosten, ayudo y cuido na docentenan
Nos a bin di un periodo dificil pa locual ta enseñansa unda cu te dia di awe ainda tin hopi intrankilidad, hopi stress pero sigur duda y falta di confiansa y sin conta cu hopi docente tambe a ser afecta pa e crisis di Covid den nan propio seno familiar.
Hopi hende ta lubida cu e docentenan tambe ta mama, tata, welo, wela, cabes di famia y cu tambe tin banda di no tin trankilidad den enseñansa tambe ta pasando den momentonan dificil den silencio den nan hogar debi na e crisis di Covid. Esaki ta haci urgente pa brinda e ayudo, sosten y cuido necesario pa nos docentanan cuido pa nan sigui eherce nan trabao trankilo y sigur por duna enseñansa lo maximo.
Y sigur e ayudo aki ta uno priva unda cu e docente por sinti su mes sigur y confia y unda esaki lo yuda su persona den e periodo dificil cu e ta pasando aden y por recupera mas pronto posibel.
Digitalisacion y 21 st century skills
Den bista cu Covid a demostra nos cu tecnologia y digitalisacion ta importante, esaki ta haci mas cu urgente pa enfoca riba 21st century skills unda mester enfoca den siña nos muchanan abilidadnan pa nan por bay cu e cambionan aki y por funciona no solamente den nan trabao pero tambe den un comunidad cu a bin ta experenciando cambionan. Den e proceso aki mester bin un revision total di nos curiculo escolar y unda hunto cu e experticio di nos propio hendenan nos por tin un producto cu lo eleva nos nivel di enseñansa.
Pa termina mi tin di bisa cu Awo Ta Su Ora pa nos por inverti den nos educacion, trece trankilidad y confiansa pa mañan nos por cosecha e frutonan.
