ORANJESTAD (AAN) – Parlamentario Hendrik Tevreden, di fraccion di MEP, a enfatiza den conferencia di prensa riba un tema cu su colega Edgard Vrolijk a trece dilanti.
Esaki ta un punto cu MEP ta bin concentrando riba dje, y sigur e ultimo dianan aki, ta cu nan ta nota cada bez durante bishitanan, cu e grupo di hoben di SPO ta creciendo, y no ta suficientemente conecta cu e mercado laboral.
“Pesey tambe, nos kier pa den e proximo gobernacion nos concentra, principalmente, riba agricultura. Di con? E muchanan di SPO tin un afinidad y ta bon prepara riba e parti aki, y nos ta kere cu si Aruba enfoca mucho mas, y duna mucho mas posibilidad riba agricultura y haci un transaccion di scol SPO pa e mercado laboral, lo ta mucho mas facil pa e hobennan aki, pero tambe ta duna nan un oportunidad di entrada pa den futuro”, e parlamentario a subraya.
E parlamentario a bisa cu den henter mundo aworaki, agricultura ta e punto principal di enfoke. E ta kere cu, cu tur seguridad den e proximo gobernacion esaki tambe lo ta asina.
Tevreden a bisa cu gobernacion Wever-Croes 1 a trece basta cambio den e tereno di agricultura, manera a baha prijs di awa pa e plantadornan y cunukero pero MEP kier eleva esaki, crea oportunidad nobo, y manera a wordo presenta den e plannan di accion di gobierno, pa agricultura bira un punto di enfoke y crecemento e proximo añanan nos dilanti, y naturalmente cu por conecta nos yiunan di tera, e muchanan specializa cu tin habilidad pa esaki, manera e hobennan di SPO, cu e mercado laboral y cu nan por solidifica nan futuro den e area aki.
