Shannon Henriquez a bira candidato nobo riba lista di MEP

ORANJESTAD (AAN): Dialuna 3 di mei, Partido MEP a lansa un otro candidato nobo riba su lista pa eleccion 2021. Un candidato cu tambe ta comparti e vision di Movimiento Electoral di Pueblo, MEP.

Shannon Henriquez no ta un persona desconoci na Aruba. Aruba por a conoce Shannon su trabaonan di liderazgo structura y excelente anteriormente. Y awe, Shannon, ta e prome candidato femenino cu a worde lansa, e candidato nobo number 5 cu a worde lansa riba lista di MEP.

Shannon Mariangela Henriquez tin 44 aña di edad, y ta mama di 3 yiu homber. Shannon ta bin di un famia humilde y trahado, cu a forma su caracter di balentia y determina.

“Mi tin suerte den bida di por bisa cu ami a lanta den un cunucu, planta y cosecha door di mi padushi. Mi ta agradecido di unda mi ta bini y mi ta agradecido di por a studia aki na Aruba mes. Mi a bishita Colegio San Jose y Colegio San Antonio Mavo, ambos na Santa Cruz. Despues di esaki mi a sigui Colegio Arubano. Mi ta orguyoso di a sigui profesionalisa mi mes na Aruba Hotel School y di e oportunidadnan cu mi a haya,” el a bisa.

“Tambe mi ta orguyoso di eherce mi trabaonan den loke mi a studia cual ta den e ramo di Recurso Humano. Pa e ultimo 10 aña mi a eherce mi trabaonan den e ramo aki den sector priva”.

Shannon a duna di conoce cu for di jong su famia a sostene e Partido di MEP y asina e mes a yuda durante varios campaña. Su pasion ta riba tereno di Recurso Humano, na unda e hende ta central y aki ta na unda Shannon ta sinti su mes identifica cu Partido MEP. Su vision ta pa lucha pa igualdad pa e ser femenino tanto den e area di labor, salario y posicion y pa tin oportunidad di progresa.

“Mi ta kere den e hende muhe y su potencial, mi kier wak mas hende muhe den posicionnan clave na Aruba. Mi persona ta identifica mi mes cu e filosofia di MEP, cu ta un Partido cu ta boga pa e hende ta central, sigur den e momento aki di Pandemia cu mundo y nos pais Aruba ta enfrentando. Pues na mi opinion MEP a demostra cu cada ciudadano di nos pais ta central. Mi ta convenci cu e hende mester haya su trato igual y mester ta central. Esaki ta mi experencia diariamente den mi area di recurso humano. MEP a demostra cu e ta un Partido cu por traha na momento di un crisis, tanto un crisis financiero manera Gobierno a encontra ora nan a cuminsa goberna, como e crisis di salud mundial, cu ta e pandemia cu nos ta aden. Poco Partido por haci esaki, facil pa goberna den tempo bon pero bo mester tin curashi y balentia pa por goberna den temponan menos bon”, Shannon a duna di conoce.

Shannon ta expresa su admiracion pa nos Prome Minister Evelyn Wever-Croes kende ta un hende muhe cu a sa di maneha e pais aki den su peor crisis financiero y a maneha e pais den un pandemia cu a asota  mundo henter.

Shannon Henriquez: “Mi ta felicita nos Prome Minister y lider di mi Partido, pa kende mi tin admiracion grandi pa su balentia, sabiduria, su curashi y determinacion pa saca nos pais for di e situacion aki. Mi tin tur confianza den esaki. Mi ta termina pidiendo e pueblo di Aruba pa su sosten pa mi persona den mi carera politico cu ta cuminsa awe. Mi ta pidi tur ciudadano pa vota consciente riba dia 25 di Juni venidero. P’esey, vota pa Movimiento Electoral di Pueblo, y ami ta conta cu bo voto. Cu bo nos ta avansa y cu Shannon Abo tambe por conta!”.