ORANJESTAD (AAN): Accion21 tabata di bishita na Respaldo pa compronde mihor e retonan ariba tereno di salud mental. Tabata di spera cu e incidencia di depresion a subi durante e pandemia.
Nan a señala cu prome cu Covid-19 ya caba un 12,000 persona lo por tabata tin mester di ayudo.
Respaldo a dobla nan cantidad di pashent y tabata atendiendo cu mas o menos 3,000 caso. Nan ta beizig ta entrenando 10 GZ psycholoog (psicologo specialisa den cuido mental) pa por ofrece un dia pa siman atencion na oficina di huisarts. Asina nan ta spera di por trata 4,000 persona cu ta un tercera parte di esnan cu mester di ayudo.
Hulanda tin un promedio di 100 GZ pyscholoog pa cada 100 mil habitante y ta awor Aruba ta aproximando 10 dus e necesidad ta keda grandi.
Mester bin mas cooperacion entre e diferente instancianan ariba tereno di salud mental. Tambe mester bin cu un sistema caminda huisarts por transferi pashentnan cu necesidad di cuido pa cu nan salud mental. Actualmente un persona sufriendo di depresion mester warda 1 aña pa ricibi cuido. Esaki ta completamente inaceptabel, mirando cu e por hasta costa bida di hende y nos MESTER haci mihor.
Awe nos a tende e tristo noticia cu un hoben a tuma su mesun bida demasiado trempan. Nos mas sincero condolencia pa e famia y amistadnan di Jhon Semeleer. Su sufrimento por a caba pero awor esun di su famia y sernan keri ta cuminsa. Ban actua pa e cos aki nunca mas sosode.
AZV mester expande pa inclui cuido preventivo. Mester sigui cu programanan pa preveni problemanan di salud mental. Respaldo a cuminsa un programa di prevencion cu mamanan na estado pa evalua nan conexion cu e futuro recien nacinan. Nos mester traha mas preventivo y inclui mas programa den scolnan pa identifica problematicanan mas trempan y como un sociedad ofrece e apoyo y ayudo necesario pa por sanea nos comunidad.
Como pais mester inverti mas den salud mental, no por ta asina cu mayoria di esnan cu mester di ayudo no por yega na dje. Nos tur ta hunto den e cos aki, ban hacie algo bon.
