ORANJESTAD (AAN): Den e conferencia di prensa Minister Maduro a splica cu e Comision Conscientisacion Sclavitud Aruba a traha riba un campaña di conscientisacion y a traha riba algun material di promocion. Pero, e tarea di conscientisacion ta uno grandi y Gobierno no por realisa esaki su so.
Pa realisa un encargo asina importante, union y colaboracion ta
necesario. Esaki ta e motibo pakico e Comision a reuni na varios ocasion cu algun stakeholders den nos comunidad pa asina hunto yega na un calendario di actividad cu e proposito di conscientisa, educa y informa comunidad di e historia y abolicion di sclavitud na Aruba. E campaña di conscientisacion ta inicia e dianan nos dilanti y lo intensiva esaki entrante lunanan venidero.
Programanan Informativo
Minister di Cultura ta informa cu durante e campaña lo haci uso di e medionan usual manera corant, radio, television y social media. Lo pone enfasis riba programanan informativo na television durante cual expertonan lo comparti nan sabiduria, riba varios parti cu tin di haber cu sclavitud. E parti di sanacion tambe lo wordo cubri pa asina sa e importancia di reconocemento y aceptacion.
E prome programa“Sclavitud: parti di herencia di Aruba”, e historiado sr. Adi Martis, lo haci un recorido door di e epocanan di historia di Aruba, en particular e temporada di sclavitud di Aruba.
E programa lo pasa riba diasabra 17 di juni pa 8’or di anochi na Telearuba y diadomingo dia 18 di juni pa 8’or di anochi na Diario tv. Minister Maduro ta extende un invitacion for di aworaki pa hunto cu famia pa wak e programa aki pa tanto nos como mayor, adulto y e muchanan por haya mas conocemento di nos propio historia.
E siguiente programanan lo pasa tur dialuna 7’or na Telearuba y diamars 8’or na Diario tv.
Encuentronan den barionan
Tambe Minister Maduro den e conferencia di prensa a trece dilanti cu lo organisa encuentronan den barionan pa brinda y intercambia di informacion tocante di e topico historia di sclavitud den nos barionan. Esaki lo wordo anuncia den medionan di comunicacion y social media. Sclavitud ta un parti di nos historia. Y e ta un parti di historia cu hopi di nos no sa masha di dje, p’esey mester brinda informacion na nos comunidad pa haya mas conocemento di un periodo importante cu a tuma luga riba nos propio pais.
Ta esencial pa nos ta consciente di kico tur a pasa, pa nos acepta cu esaki ta un parti scur di e historia comparti den Reino Hulandes y pa evita di haci mesun errornan di humanidad cu awe ainda ta keda refleha den discriminacion y distincion.
Pa minister Maduro ta importante pa nos conoce nos pasado, ya cu esaki ta duna nos e conocemento necesario pa compronde nos presente y yuda nos fiha nos futuro. Sclavitud tambe a forma parti di nos pasado y p’esey ta importante pa conoce e historia aki pa evita cu nan por ripiti den presente y futuro.
E encuentronan den barionan ta pa nos conoce e parti no mucho conoci aki di nos pasado, stimula dialogo den famia, organisacionnan, instanciannan, pa sa mas di e topico di sclavitud. Door di investiga, explora, conoce storia y historia, y hunto dialoga nos por duna un cara y honra e bida di nos ancestronan.
