ORANJESTAD (AAN)—Den entrevista cu Michella Steenvoorde-Lacle, Presidente di e Comision Plan di Mayor, a duna di conoce cu mester warda ainda riba Parlamento, pa set up un fecha pa trata e Ley di Mayor.
E ley aki ta encera cu prome cu mayornan separa, mester traha un plan di mayor den cual nan ta yega na acuerdonan mutuo con ta bay comparti e responsabilidadnan cu nan
tin cu nan yiunan.
Pa esaki e Comision a prepara e “zorgtraject” pa por yuda e mayornan preventivamente, pa nan no yega na divorcionan complica. Nan a haci esaki ora cu nan a lesa e rapport di con e ley aki ta funciona na Hulanda, y kico tabata su efectonan, ora nan a introduci’e na 2009.
Michella a indica cu tabata tin efectonan position pero tambe e “kindersitzer” y e comision a siña di dje y a premira cu mester haci triage. El a subraya cu depende di e conflicto di e mayornan ki ruta nan ta haya: Fase 1 ta un ruta, mescos cu Fase 2 y Fase 3.
El a splica cu e ruta 1 ta uno simple. E mayornan ta hiba e mesun linea, nan kier gewoon divorcia, pero kier e di miho pa nan yiunan, ta dispuesto na bay un tayer di trabao, of via website mes nan por traha un plan di mayor, y ta yega na areglonan nan mes.
Pa e ruta 2, den e locket di e Comision di Mayor, lo bay ofrece “mediacion”. Esaki lo wordo haci door di e 13 profesionalnan cu a wordo instrui como mediador di famia. E ruta 3, ta esun cu mayoria di biaha e Huez ta uza, y cu ta curativo. Esey ta ora nan no ta yega mes na un plan di mayor, anto e Huez ta delinea e ruta pa e mayornan. E Huez ta bisa e mayornan cu of nan ta scoge e decision pa kita e custodia pa un di nan, of un ruta di onderzoek pero nan ta dicidi.
Michella a agrega cu den tur esaki no por lubida e muchanan. Nan ta central y tin derecho di worde scucha, y duna nan voz den tur esaki. Pa esey nan ta bay laga nan yena un “kids plan” den cual nan lo vocifera kico ta nan deseo den tur e proceso aki.
