ORANJESTAD (AAN) – DIARIO a tuma contacto cu e Relacionista Publico di Departamento di Impuesto (DIMP), señora Meverly Romano, ya cu algun famia den cual un miembro cu a perde trabao a ricibi FASE, y awo, cobranza di impuesto a bati porta di cas.
E cobranza ta bin pa esun cu banda di Fase a haya otro entrada, of pa
e partner cu no a perde trabao pero cu no a pensa mes cu e 950 di Fase lo wordo suma despues, na su entrada.
Hasta e suma ta wordo desconta di retribucion di impuesto, manera un caso specifico cu DIARIO a uza como base, pa realiza algun pregunta na señora Romano.
Señora Romano a tuma su tempo, y duna DIARIO un splicacion detaya, en general, tocante e proceso. Señora Romano a indica cu Fase ta un entrada cu pa impuesto ta cay bao di categoria di “pago periodico" y riba cual mester paga impuesto mescos cu pensioen di behez (cu tambe ta un pago periodico).
Pero un persona cu solamente a haya fase no ta yega den e margen pa paga impuesto. “E margen pa paga impuesto ta durante aña 2019-2022 e suma di 28.861 florin.
“Si un persona a ricibi FASE solamente durante un aña, e entrada ey no ta bay surpasa 28.861 florin, y esey ta e motibo pakico e persona ey no ta bay paga Inkomstenbelasting” Romano a splica.
“Pero si e persona cu a ricibi FASE tabata tin otro entrada cu en total ta surpasa 28.861 florin, e ora ey si lo paga Inkomstenbelasting”, el a agrega.
El a sigui splica cu den e caso di un pareha casa, Inspector di impuesto ta wak e entrada di ambos den e pareha, y mester determina ken ta esun cu tin entrada mas halto.
E partner cu tin entrada mas halto ta haya tur otro entrada di su pareha, cu no ta salario of ganashi di empresa.
“Por ehemplo: si e señora tin un salario di 20.000 pa aña, y e homber a ricibi FASE di 5.000 total, den e caso aki e señora ta esun cu ta gana mas. Esey ta nifica cu e entrada di e homber ta wordo conta hunto cu e entrada di su señora. Impuesto lo cobra e señora riba un entrada di 25.000 y e tin derecho di deduci su gastonan personal, kinderaftrek, etc., pa asina e suma por baha y paga menos impuesto”, señora Mevely Romano a conclui.
Esaki ta splica pakico den diferente caso unda un señora casa a keda sin trabao durante e periodo di pandemia y a acoge na e ayudo di FASE, awo su pareha ta esun cu ta haya e cobranza di impuesto door cu e 950 pa luna di FASE, DIMP a sum’e na su entrada mensual.
