Parlamentario Carlos Bermudez di AVP
ORANJESTAD (AAN): Durante e di dos dia di tratamento di e Presupuesto Supletorio 2025, Parlamentario Carlos Bermudez, na nomber di fraccion AVP, a entrega un mocion formal den Parlamento caminda ta pidi gobierno pa ahusta of presenta un beach policy nobo cu ta garantisa y salvaguardia e derecho di localnan y turistanan pa haci uzo liber di nos beachnan.
Segun Bermudez, e acceso liber na beach ta un principio fundamental pa Aruba como destino turistico y como comunidad. “Nos beachnan ta parti di nos patrimonio natural y cultural. E derecho pa acceso liber no por wordo limita of restringi pa interesnan particular,” el a declara.
Den e mocion, fraccion AVP ta solicita gobierno pa inicia implementacion di e beach policy, sea e version ahusta of un politica nobo, no mas tarda cu comienzo di 2026. E meta ta pa tin plan cla pa ehecuta cu ta preveni situacionnan di exclusion y confusion riba beachnan publico.
Bermudez a indica cu el a tuma nota cu satisfaccion di e anuncio reciente di Minister di Turismo, Wendrick Cicilia, y Minister di Infraestructura, Rene Herde, cu pronto lo tin un ahustacion di e beach policy existente. “Esaki ta mustra cu ora Parlamento entrega un mocion cu base riba preocupacion legitimo di pueblo, Gobierno ta honra e mocion y ta tuma accion. Asina e sistema mester traha,” Bermudez a enfatisa.
El a agrega cu AVP ta insistí riba un politica cu ta cla, transparente y aplicabel, pa evita situacionnan manera ta observa na otro paisnan den region. “Nos no kier y nos no lo acepta nunca un escenario caminda pueblo mester mendiga pa subi riba un beach, caminda acceso ta prohibi of caminda mester paga simplemente pa disfruta di lama. Esaki no ta y nunca lo ta e modelo pa Aruba.”
Fraccion AVP ta reafirma su compromiso pa sigui monitor e proceso di revision y implementacion di e beach policy, cu meta pa proteha acceso liber, mantene ekilibrio entre desaroyo turistico y interes di comunidad, y salvaguardia nos beachnan pa generacionnan presente y futuro.
