Ley nobo pa castiga iresponsabilidad y proteha bida riba caminda

MEP ta cumpli

ORANJESTAD (AAN): "Como lider, mi prioridad semper lo ta e siguridad y trankilidad di nos famianan. Bida humano ta sagrado, y nos no por permiti mas dolor causa pa individuonan iresponsabel riba caminda," lider di MEP, Evelyn Wever-Croes, a declara den Parlamento den cuadro di e aprobacion di e ley nobo di trafico.

   Bo proteccion ta nos prioridad: Nos tur a biba e dolor di mira famianan destrui pa motibo di "hit and run" of coremento di auto iresponsabel sin tene cuenta cu otro. Evelyn a splica cu MEP a scucha e sclamacion di pueblo y a actua cu firmesa.

   E ley di iniciativa nobo aki, traha pa Edgard Vrolijk y Rocco Tjon, ta introduci castigonan hopi mas pisa pa esnan cu core auto den forma peligroso. "Nos ta manda un mensahe cla: den nos Aruba, nos ta cuida otro. Esun cu scohe pa core irresponsabel y pone bida di un mama, tata of yiu na peliger, lo enfrenta consecuencia serio di ley," Evelyn a enfatisa.

   Trabao serio cu ta duna fruta: Evelyn a resalta cu liderazgo berdadero ta wordo demostra cu echo, no cu palabra bashi. El a gradici e vision di su coleganan:

   Edgard Vrolijk a declara cu esaki ta su di 9 ley di iniciativa. Vrolijk ya a logra leynan importante manera esun di Integrity di Minister y e Ombudsman. E ta un lider cu ta traha keto, cu hopi disciplina, semper pensando con pa haci nos pais mas fuerte y husto pa tur.

   Rocco Tjon a splica cu su di 5 ley di iniciativa, e ta sigui fortifica nos siguridad y awor tambe ta enfocando riba salud preventivo, specialmente salud mental.

   Union pa un futuro mas sigur: Evelyn a conclui recordandone pueblo cu MEP ta e partido cu ta trece trankilidad y orden. "Mi ta orguyoso di lidera un fraccion cu ta traha cu curason y responsabilidad. Sea den Parlamento of den Gobierno, nos compromiso ta pa Aruba semper keda un pais sigur pa nos tur. Esaki ta e union y e seriedad cu nos pais merece.”