ORANJESTAD (AAN) — Despues di e presenta Aruba e prome informacion riba e posibilidad grandi di un acuerdo entre e compania Quanten Consortium Aruba y Aruba, DIARIO a atende informacionnan ricibi di QCA cu expertonan riba tereno economico
y financiero.
Informantenan clave riba tereno economico a mustra DIARIO, cu mester mira mas leu cu entrada di un compania cu ta bay atende e loke nan a yama “restonan di Lago”.
Esaki debi na e hecho cu e expertonan di DIARIO na 2018 tabata e personanan tras di informacionnan di DIARIO cu e tempo a mustra cu Aruba mester lubida Citgo.
Awe e conocedonan cualifica di materia economico, a mustra DIARIO cu te na 2018 ora tabata papia di proyecto refineria, tabata papia di un reanimacion di loke a resta di Lago.
“Reapertura Lago, tabata palabranan cu sentimentalismo politico, pero cu realmente tabata papia di duna bida na instalacionnan bieu na un refineria, cu mester a rebiba. Den caso di e proyecto cu Prome Ministro Evelyn Wever-Croes a introduci, no por papia di reanima un refineria bieu pero di deshaci di loke no ta sirbi pa introduci un concepto completamente nobo y moderno cu ta basa riba futuro,” nan a trece dilanti.
E conclusion aki tabata basa riba informacionnan cu DIARIO a presenta na e expertonan y cu DIARIO a ricibi di parti di Quanten (QCA), cu kier bini cu e proyecto nobo pa refineria.
Central den e declaracionnan di representantenan di Quanten, ta e palabranan cu ta desmantela y deshaci di loke no ta sirbi pa construi un planta, cu por sostene economia di Aruba den e exigencianan cu tempo lo presenta.
Si bolbe na loke DIARIO a publica na 2018 riba e proyecto Citgo, por nota cu basa riba informacionnan di e expertonan, DIARIO a rechasa e idea cu por reactiva Lago.
Expertonan ta mustra claramente cu aki ta papia di un concepto nobo, cu ta mustra riba un pilar economico basa riba loke futuro ta exigi.
Mientras e parti tecnico tambe a wordo atende, na prome luga a wordo mustra riba e diversificacion economico cu por spera, ya cu e proyecto aki lo anima cantidad di proyectonan nobo cu Arubianonan mes por pone den accion.
Ora pone e proyecto den cuadro di e Master Plan di Prome Ministro Evelyn Wever-Croes por nota cu e proyecto di Quanten lo exigi un infrastructura nobo di parti di Aruba, cu mester renoba su economia na momento cu ta busca forma pa restablece base di entrada.
“Prome Ministro Wever-Croes a papia di un base nobo, duradero y solido pa Aruba. Esaki ta bini claramente dilanti den e proyecto, cu lo haci posibel pa actividadnan local economico wordo diversifica,” informantenan a mustra.
E proyecto ta papia di e parti tecnologico directo, pero tambe di creacion entre otro di un centro di informacion y varios nucleonan importante pa economia di e pais,” expertonan a indica.
Importante ta cu QCA, cu ta e compania Arubano cu kier bini cu e proyecto nobo pa refineria na Aruba, a nace di un compania Mericano, cu ta mara na regla na Merca. Uno di e reglanan aki ta cu tin transparencia den e proyecto cu no por ta un aventura.
QCA ta mara directamente na cooperacion cu Universidad di California, renombra pa su buskeda di energia limpi y conceptonan inovador pa proteha medio ambiente, segun expertonan.
E informacionnan cu DIARIO a ricibi riba e loke Quanten a trece dilanti, ta mustra cu pa expertonan local e proyecto nobo pa refineria, lo genera actividad economico independiente pa e Arubiano pero tambe lo forsa cambionan importante den maneho economico y infrastrucura na Aruba loke lo beneficia e pais den creacion di un futuro nobo.
