ORANJESTAD (AAN) — Democracia ta basa riba husticia. Husticia ta basa riba e realidad cu hende ta haya loke e merece y loke e merece ta loke e ta desea. Laga nos
no haci wega. Na April 2020, nos tur a kere cu no solamente Aruba, pero henter mundo lo a bandona su orbita.
Un pandemia cruel a deshaci di tur loke ta normal den tur comunidad y na tur pais na mundo.
Tur plan a basha abou y na Aruba sigur esaki tabata importante pasobra loke
Aruba (cu ta wordo representa dor di Gobierno) a hereda, tabata un desaster financiero manera nunca historia di Aruba a conoce.
Loke Mike Eman a haci cu Aruba sigur ta skirbi un historia riba su mes pasobra hamas Aruba a registra un situacion den cual e debe cu gobierno a crea pa awe y futuro ta casi mes halto cu loke e pueblo ta produci.
Tur hende ta na haltura di loke a wordo entrega dor di Mike Eman na Aruba na 2017 ora Aruba tabata realmente bankroet.
Hulanda a haya tur motibo pa bisa cu Aruba no por para riba su pia y tabata na Gobierno Evelyn Wever-Croes pa mira con ta bandona problema hereda.
Aruba a logra pasa den un pandemia cu ainda no a termina. Aruba na e momentonan aki ta spera cu e por haya un operador pa e refineria, pero cu un acuerdo cu no ta morocho di e desaster na cual gobierno Mike Eman a horca Aruba cu Nicolas Maduro.
Aruba mester di su trankilidad pa e sector di turismo, cu ta lucha cu alma y curpa, por conoce reconstruccion mientras turismo ta spera cu e vacuna lo yuda restablece e confiansa di turistanan pa biaha.
Hotelnan na Aruba a pasa den momentonan sumamente dificil y cantidad di trahado di sector priva awe ta den problema financiero grandi.
Con Aruba ta haya placa pa complace tur hende? Con e Arubiano sin trabou ta sinti su mes ora busca un solucion pa e situacion financiero di Aruba?
Hinca un pais den problema, ta facil. Sigur si bo pone hende baila y goza manera a pasa cu e gobierno di Mike Eman, cu paso a paso a destrui Aruba mientras e tabata sunchi y brasa pa haya voto.
Awe no tin tempo pa wega mas.
Gobierno mester a bay cas. Evelyn Wever-Croes nunca mas por a papia di integridad si el a acepta sosten di un persona cu ta sospechoso den un caso penal pero cu ta den Parlamento.
Pa colmo e caso di Alan Howell, ta directamente relaciona cu placa di Parlamento mes.
Howell mester atende cu Husticia pero Aruba no por keda mara na loke lo pasa den e caso aki.
Na mes momento Evelyn Wever-Croes no por a mantene un gobierno cu no tin e sosten necesario den Parlamento.
Awe Aruba ta lucha pa sigui dilanti. Aruba tin derecho di sigui dilanti tambe. Aruba tin derecho ariba trankilidad y sigur e Arubiano cu kier mira su pais cu trabou y futuro tambe.
Aruba no tin placa. For di 2014 Hulanda mes a splica esaki y a pidi for di e tempo pa Gobierno tuma medida.
Bienestar y futuro di Aruba ta na wega y no tin espacio pa wega politico.
Na urna electoral cada kende ta vota pa nan candidato. Pero mientrastanto duna Aruba espacio pa recupera pa tur cu sa kico ta hamber pa motibo di pandemia, haya un oportunidad di come trankil atrobe ora e pais recupera financieramente a base di responsabilidad gubernamental real!
