ORANJESTAD (AAN) – Minister di Enseñanza, Ciencia y Desaroyo Sostenible, Rudy Lampe, a participa den e conferencia di prensa di Gobierno, Diahuebs mainta, unda el a comparti un grato noticia, referente na un inversion extra den renovacion den
e sistema di enseñanza, cu a keda aproba. E Plan Estrategico Nacional, bao guia di e Departamento di Asuntonan Economico, a pone inversion pa yuda desaroya un modelo economico nobo.
“Y den e cuadro ey a keda aproba 4.2 miyon florin cu ta bay wordo inverti den innovacion di nos sistema di enseñanza, specialmente nos enseñanza di ofishi.
“Ta asina aki cu Aruba mester reinventa su modelo economico y ta hopi importante pa nos pensa riba sistemanan di turismo alternativo, manera turismo medico, pensa den e direccion di economia circular, hopi mas dirigi riba un economia interno, y pa loke ta e siglo XXI despues di Covid-19, cual nos ta drentando, ta hopi importante pa nos prepara nos siguiente generacionnan pa un futuro nobo. Y pesey, bo tin cu duna nan habilidadnan nobo cu nan por uza, pa por ‘make it’ den e futuro nobo y un di e habilidadnan principal ta sistema digital”, Minister Lampe a expresa.
Pa tal motibo e inversion aki lo ta bay ta dirigi na e maestronan cu ta esnan encarga di forma e alumnonan na scol. Y lo bay prepara nan mas den e habilidadnan digital aki pa nan por transmiti esaki tambe, na nos futuro generacionnan.
“Lo bay inverti parti di e suma aki den loke ta conoci como ‘leerlingvolgsysteem’ (sistema di siguimento di studiantenan) pa asina aki bo tin data al instante riba tur e poblacion escolar, y enberdad por tin un miho maneho basa riba data y ta bay instrui e docentenan den e direccion aki, con pa haci un miho uso di un leerlingvolgsysteem”, e dignatario a trece dilanti.
Minister Lampe a agrega cu muy specialmente, lo bay traha den cooperacion cu un institucion di Hulanda pa mehora loke ta wordo yama e posibilidadnan di doorstroom den bo educacion di ofishi.
“Nos tur sa cu hopi mucha ta bay EPB y nan no ta yega EPI y ta bay SPO y eynan ta yega e final pa nan. Y esey ta parti tambe di e acuerdo cu nos tin cu Hulanda, cu e doorstroom pa loke ta nos enseñanza di ofishi, mester mehora”, Lampe a indica.
Pesey, el a bisa, e inversion aki ta bay ta den EPB y EPI, principalmente, unda ta bay cambia e sistema di enseñanza, mas dirigi riba “competentiegericht onderwijs” cu ta mas dirigi riba habilidadnan (skills), promove nan bao nos studiantenan, y ta hopi mas practico.
“E ta hopi mas dirigi cu bo entrena na pia di trabao. Y pesey, e ta bay nifica full un cambio den e forma di enseñanza pa EPB y EPI, pa nos sistema di enseñanza di ofishi unda ta bay prepara nos futuro generacionnan, y duna nan miho hermentnan pa nan ta prepara pa loke ta biniendo ”, Minister di Enseñanza Rudy Lampe, a splica.
