Parlamentario Xiomara Maduro:
ORANJESTAD (AAN): Normalmente tur minister ta haci nan biahe di trabou via avion comercial y si ta algo urgente por pasa cu Gobierno ta charter un avion. Poco dia pasa Pueblo por a mira un transmicion en bibo riba Facebook unda Minister Gerlien Croes ta anuncia cu e ta biahando pa Corsou pa topa e team di futbol di Corsou cu a sali victorioso. Cuestionabel ta cu e biahe di Gerlien no tabata den un avion comercial, sino den un avion priva.
Gerlien ta actua contra bon gobernacion
Como cu ta contra regla di bon gobernacion pa ministernan haci biahe den avion priva, parlamentarionan di oposicion a cuestiona y a pidi mas claridad di Minister Gerlien Croes riba e biaha aki. Despues di varios critica, porfin e mandatario di partido FUTURO a manda documentacion pa ful Parlamento haya sa mas detayes di su biahe pa Corsou.
Gerlien ta sconde informacion pa Parlamento
Ora di repasa e informacion a bira bisto, cu Minister Gerlien NO a manda TUR informacion. Ela manda un “breakdown” di gastonan y nan factura como prueba, pero ningun caminda a splica riba e motibo y e gastonan relaciona cu su biahe den avion priva, manera Pueblo por a mira den e transmision en bibo.
Gerlien no por presenta prueba
Ya ta basta dia caba cu oposicion a cuestiona e mandatario di FUTURO aki y te ainda nada cu Minister Gerlien ta sali publica prueba pa Pueblo mira ta pakico ela bay Corsou den avion priva, cuanto e biahe cu avion priva a costa y ken a paga e gasto di e avion priva. Door cu e mandatario ta keda sin haci esaki, e ta crea e pensamento den Pueblo cu locual ela haci ta robes sea contra ley, contra regla di bon gobernacion of ta contra regla di integridad.
No scucha Gerlien su palabra, mira su actonan
Ta e mesun Minister Gerlien Croes cu largo bay ta papia riba transparencia, awe ta demostra Pueblo cu e no ta nada transparente, ya cu e no tin fin di mustra prueba di su biahe den avion priva. Anto cu e manera di actua aki boso ta kere cu Gerlien ta un mandatario y persona integro?
