Parlamentario Evelyn Wever-Croes:
ORANJESTAD (AAN) Parlamentario mr. Evelyn Wever-Croes den entrevista cu DIARIO a comenta, cu ya un siman a pasa desde cu Minister Gerlien Croes a bay biaha den un jet priva, sin cu a duna ningun informacion na Parlamento.
“Kico ta e caso? Siman pasa Minister Gerlien Croes mester tabata na Curacao di dia 20 te 22 di November, pa un conferencia di deporte. Pa cu esey, algun dia prome el a haya aprobacion di Conseho di Minister, pa e biaha di Diahuebs pa Diasabra. Mientras tanto, e team di Curacao a clasifica pa e Mundial, prome cu Diamars rumbo pa Curacao Diaranzon, prome cu esey. E ora e minister a dicidi cu e tambe kier bay Curacao pa ricibi e team di Curacao, ayanan na Curacao, y a bula den un jet priva pa por yega Diaranzon aya”, Parlamentario Wever a señala.
El a comenta cu riba un minister cu ta biaha den un jet priva, semper tin hopi pregunta pasobra ta nada usual. “Na momento cu ta bira usual cu nos ministernan ta biaha den jet priva, ta e momento cu Aruba tin hopi placa y no tin ningun problema. Den e caso aki, esey no ta e caso ainda. Nos di Fraccion di MEP a haci preguntanan hopi critico riba esaki y nos ta haciendo un investigacion pa compronde kico a pasa, ken a paga pa e jet priva, y con e proceso di toma di decision a bay den Conseho di Minister pa e minister por a biaha den un jet priva!” Parlamentario Evelyn Wever-Croes ta cuestiona.
E t’asina aki cu si acaso Minister su mes a pag’e, Fraccion di MEP kier mira un prueba cu e mes a paga. Si ta gobierno a pag’e nan kier mira un prueba di esey.
“Y e ora nos tin e critica cu tanto placa pa un jet priva, 4 of 5 mil florin ta bay pa un minister biaha, siendo cu ta placa di deporte cu mester inverti den nos deportistanan local”, Wever-Croes a señala.
