Parlamentario Wever Croes ta recomenda Minister Gerlien Croes:
ORANJESTAD (AAN) – Parlamentario mr. Evelyn Wever Croes, a sigui elabora tocante e viahe di Minister Gerlien Croes pa Corsou, den un jet priva, pa ricibi Corsou su team di futbol cu a clasifica pa e Mundial 2026, sin cu el a informa parlamento, y fraccion di MEP tin un investigacion al respecto.
Parlamentario Wever Croes a expresa cu su trabao di Parlamento ta pa controla gobierno aki; sin nada personal contra ningun hende, e ta wordo paga y a wordo elegi pa controla gobierno y esey ta locual fraccion di MEP ta haciendo.
“Nos tabata tin un reunion den Parlamento Dialuna ultimo, den cual Prome Minister tabata presente, unda cu el a priminti prome cu e reunion a caba cu Minister Gerlien Croes ta bay duna nos tur documento.
Minister Gerlien Croes a manda cierto documentonan, pero no di e biahe den jet priva. El a manda di un otro biahe. Di e biahe cu tabata tin planea Diahuebs dia 20, cu tabata un biahe den linea regular cu tabata 900 florin. Esey nos a haya, no e preguntanan riba biahe den jet priva, Parlamentario. Un siman a pasa y ainda nos no a haya e contestanan aki” Wever-Croes a reitera.
El a agrega cu si Minister Gerlien Croes tin nada di sconde fraccion di MEP ta recomend’e, ta urgi’e duna informacion. “Pasobra nos investigacion ta continua. Nos kehonan a wordo entrega caba; mas lihe e duna nos informacion pa nos haya sa e berdad, mas facil full e proceso ta bira. Mi ta ripara cu e ta bira hopi onsportief ora nos ta haci pregunta, mi ta ripara cu e kiermen cu ta un cos cu mi no por biba sin dje”, e Parlamentario a señala.
Wever-Croes a expresa cu e no tin nada contra e mandatario, pero ta su trabao e ta haci, su responsabilidad, y el a huramenta pa controla e gobierno aki y tur e ministernan. “Tin un minister cu a biaha den jet priva, ta mi trabao haci pregunta”, Wever- Croes a recalca.
