Prome aña di Partido Futuro treciendo un aña di algo diferente pa Aruba

Lider di Partido Futuro, Gerlien Croes:

ORANJESTAD (AAN): Den su funcion como Lider di Partido Futuro, Gerlien Croes, ta gradici su votadornan pa e sosten den e prome aña di Partido Futuro. E Lider di Futuro ta considera algo hopi grandi pa pais Aruba cu tin un desaroyo nobo den politica na Aruba. E resultado di eleccion ultimo unda Partido Futuro a sali e di tres partido mas grandi, ya ta algo grandi. Pero e cambio den maneho na e momento aki, e gobierno di coalicion ta mustrando cu nan norma y balornan, meta, vision y mision, ta locual nan ta ehecutando segun loke nan a presenta durante campaña electoral como partido.

   Lider di Partido Futuro a enfatisa cu como parti di coalicion, nan ta restructurando hopi proceso den e aparato gubernamental cu transparencia y honestidad cu pueblo. Ta publica y ta splica lo necesario a base di documentacion. Segun Minister Gerlien Croes, Aruba no tin mester aworaki e politica di desinformacion y instigacion. “Un pais uni y informa ta e pais di mas poderoso cu tin. Y esaki ta loke cu ta lidera politica pa nos como miembro di e partido”, Lider di Futuro a expresa.

   E lider a expresa cu e ta sumamente orguyoso di miembronan di e partido cu den e ultimo lunanan ta cuminsa crece tambe den nan trabou cual ta algo hopi importante pasobra politica no ta un ramo cu tin hopi persona interesa pa ta den. Y e tiki personanan cu ta den politica tin di soporta hopi di e politica cu ya pueblo no kier mas.

   “E politica cu ta wordo hiba ultimamente, especialmente di esnan cu tawata goberna nos pais, ta hopi baho, denigrante y ta bay hopi personal. Y esaki no ta e ehempel cu nos kier duna pais Aruba y nos futuro generacion”.

   Lider di Futuro a expresa di ta hopi orguyoso di nan como partido den gobierno ta cumpliendo cu locual a trece dilanti como partido durante campaña, saliendo for di un programa di partido cu a traduci su mes den un programa di gobernacion detaya.

   “Y si wak cada punto den e programa di partido y compara loke a haci den e tempo cu a goberna, bo ta identifica tur loke ya a wordo ehecuta of cu ta den proceso di ehecucion.  Esaki tambe mi ta kere ta e manera cu Aruba kier wak cu por demostra cu di berdad gobierno ta cumpliendo. Mi ta hopi contento, esaki ta un aña di ago diferente pa Aruba. Mi ta agredecido semper pasobra sin comunidad, nos lo no a haya e oportunidad aki”, Lider di Partido Futuro a enfatisa.