Gobierno no ta duna ningun informacion relaciona cu situacion tenso entre Merca y Venezuela 

Fraccion MEP:

ORANJESTAD (AAN): E siman aki e medio di comunicacion local a publica un entrevista cu Commandant di Marina Hulandes, Harold Liebregs, cu a adverti abiertamente cu Venezuela ta forma un peliger serio pa e islanan ABC, y cu Aruba ta vulnerabel. 

Di parti di Gobierno di Aruba mes no ta duna ningun informacion, y esey ta haci e sentimento di duda y insiguridad aun mas grandi. Basa riba e noticia aki Fraccion di MEP a haci preguntanan oficial na e Prome Minister Mike Eman riba e situacion preocupante di siguridad cu ta menasa nos isla. 

“Nos ta hopi preocupa, no solamente pa siguridad di nos pueblo, pero tambe pa nos economia y turismo. Aruba ta un isla cu ta depende hopi di confiansa di nos bishitante, y cada señal di instabilidad tin consecuencia directo pa nos futuro. 

E mas preocupante ta cu a pesar cu e Prome Minister a priminti Parlamento pa tene Parlamento na altura, e no a cumpli cu e promesa. Te awor gobierno ta keda completamente silencioso, mientras tension den region ta subi dia pa dia, y sin cu tin ningun plan. 

Nos pueblo merece claridad y liderazgo. Nos ta mira un falta total di direccion y un gobierno cu tin hopi problema pa enfrenta realidad. Aruba no por sigui den un situacion caminda no ta duna informacion y no ta duna cara.  Nos a urgi Gobierno pa presenta su plan di emergencia pa proteha nos pueblo. Tambe pa informa mas detaya cu ta posibel, con grandi e riesgo real ta pa Aruba. Y nos a urgi gobierno pa duna transparencia na nos pueblo y na nos bishitantenan riba con nos ta prepara pa cualkier eventualidad. 

Liderazgo tin cu wordo demostra den tempo di crisis, no den silencio. E silencio di e Prome Minister ta crea mas miedo y mas inseguridad. Aruba y su pueblo ta merece hopi miho.

Nos ta spera di haya contesta pronto”, lider di Fraccion di MEP Evelyn Wever-Croes a informa.