Presidente Marlon Sneek ta bayendo riba un caminda peligroso pa nos democracia

Lider di Fraccion di MEP Evelyn Wever-Croes:

ORANJESTAD (AAN): Segun Lider di Fraccion di MEP, Evelyn Wever-Croes, cu hopi preocupacion y tristesa el a tuma nota cu e Presidente di Parlamento Marlon Sneek ta sigui nenga pa yama un reunion di Parlamento tocante ley di Reino HOFA, a pesar di un peticion formal di 9 miembro di Parlamento. Esaki no ta un asunto politico normal. Esaki ta yega te den e curason di nos democracia. 

Ta hopi preocupante cu e Presidente ta sconde su decision tras di e lidernan di fraccion di Futuro, Ruthlin Lindor, y di AVP, Jennifer Arends-Reyes, cu lo a laga sa cu nan lo no atende e reunion ey. Pero nos mester ta cla: e responsabilidad no ta di e fraccionnan. E responsabilidad ta di e Presidente di Parlamento. E puesto cu e tin ta exigi independencia, curashi y respet pa nos Constitucion y pa e Reglamento di Orden di Parlamento. 

Ningun Presidente di Parlamento por pone su mes riba e ley, riba e Reglamento di Orden of riba e Constitucion di Aruba. Parlamento ta e institucion mas halto di nos democracia, y ningun persona su decision personal por stroba Parlamento di reuni y haci su trabou. 

Laga nos ta cla cu pueblo di Aruba: esaki ta un caminda peligroso. Ora regla no ta wordo sigui, ora minoria no ta wordo scucha, ora Parlamento no por reuni, nos democracia ta bira debil. Y ora democracia bira debil, tur hende ta perde. 

Wever-Croes a manda un carta pa sr. Marlon Sneek, den cual el a  haci un yamada serio na e Presidente di Parlamento pa e cumpli cu su deber, respeta e Reglamento di Orden, y yama e reunion dentro di 30 dia, manera mester ta segun ley. No pa un partido, no pa un gobierno, no pa un oposicion, pero pa Aruba y pa nos democracia. 

Wever-Croes a enfatisa, "democracia no ta di un persona. Democracia ta di pueblo."