Parlamentario Evelyn Wever-Croes:
ORANJESTAD (AAN): Minister di Relacionnan di Reino, Enseñansa, Innovacion y Deporte, Gerlien Croes, despues di casi cinco luna, a contesta preguntanan cu Fraccion di MEP den Parlamento a haci dia 6 di November 2025. Ta trata aki di 13 pregunta tocante un biahe oficial pa Hulanda cu e minister a haci.
Sinembargo, segun Lider di MEP, Parlamentario Evelyn Wever-Croes, Fraccion di MEP y Partido MEP, e contestanan mas bien tawata un falta di transparencia, curashi y un berguensa pa un mandatario educa por a duna. Aki ta sigui e prome 7 preguntanan y nan contesta di Minister Gerlien Croes.
E Minister a contesta e prome pregunta: Cua tabata e meta oficial di bo dienstreis pa Hulanda? E Minister a contesta: Participa den RMR. Cu RMR, e minister ta referi na Rijksministerraad. Y despues di esaki, e minister a contesta ‘Mira pregunta 1’ (‘Zie vraag 1’) na casi tur pregunta.
Pregunta 2: Bo por indica cu cua instancia, funcionario of organisacion bo a papia aya? Contesta ‘Zie vraag 1’. (Mira pregunta 1).
Pregunta 3: Cua tabata e temanan trata durante e encuentronan nan aki? Contesta: ‘Zie vraag 1’ (Mira pregunta 1).
Pregunta 4: Tabatin un invitacion of iniciativa di nan banda, of e biahe a wordo inicia door di bo ministerio? Contesta: ‘Zie vraag 1’ (Mira pregunta 1).
Pregunta 5. Cua ta e intencion di maneho of resultado huridico di e biahe aki pa bo ministerio? Contesta: ‘Zie vraag 1’ (Mira pregunta 1).
- A haci acuerdonan, declaracionnan di intencion of lasonan di colaboracion nobo of renoba durante e biahe aki? Contesta: ‘Zie vraag 1’ (Mira pregunta 1).
- Si esaki ta asina, bo por pone nan disponibel pa Parlamento (ter inzage)? Contesta: Aki bo contesta.
Parlamentario Evelyn Wever-Croes a expresa cu nunca el a conoce un minister cu tin asina tanto miedo di duna informacion y papia berdad. Segun el a expresa den medionan social, e minister aki ta kere cu e por keda sin duna informacion. E no ta duna informacion di su biahenan mientras tur luna e ta biaha. Esaki no ta acuerdo cu normanan di integridad y di bon gobernacion.
Mas importante, Parlamentario Wever-Croes ta puntra pueblo di Aruba kico pueblo mes ta pensa di e actitud aki di Minister Gerlien Croes. E contesta ‘Zie vraag 1’ cu el a duna, ta pas na cada pregunta? Esaki ta un actitud di un mandatario pa trata Parlamento y pueblo? Esaki ta segun etica di bon gobernacion y integridad?
