Parlamentario Evelyn Wever Croes:
- Mientras cu Gobierno ta faltando respet na Parlamento
ORANJESTAD (AAN): Parlamentario Evelyn Wever Croes a duna di conoce cu tin un problema serio na Parlamento. Segun el a menciona den un entrevista cu DIARIO, nos Parlamento ta hopi desfuncional. Segun constitucion, ora un parlamentario pidi un reunion, esaki mester wordo yama dentro di 30 dia, y si esaki no wordo yama, mester duna un fecha ki dia si e reunion por tuma luga.
E parlamentario a indica cu Fraccion di MEP den Parlamento a pidi varios reunion entre otro riba e ley di Reino Hofa; riba e desaroyo geopolitico; e situacion di guera di Iran y e impacto economico riba costo di bida na Aruba; y e tema di jet priva di Minister Gerlien Croes. Ningun di e reunionnan aki y otronan a wordo yama apesar cu a haci peticion varios biaha riba algun di nan mustrando e importancia pa claridad y informacion.
Aparte cu e reunionnan no ta wordo yama den e tempo stipula segun constitucion, Parlamentario Wever-Croes a agrega cu Fraccion di MEP ta haci hopi pregunta na Gobierno pa haya informacion. Sinembargo, tampoco nan ta haya contesta di Gobierno di Aruba. Esaki, el a expresa, ta trece hopi frustracion den nan trabao den Parlamento.
Fraccion di MEP a pidi un reunion urgente cu Presidente di Parlamento Marlon Sneek hunto cu demas lider di fraccionnan cu a tuma luga 10 di maart ultimo. “Den e reunion aki mi a bisa e Presidente di Parlamento cu e mester carga su responsabilidad. Aki nos no ta na merced di Gobierno. Nos ta Parlamento y tin responsabilidad cu nos constitucion ta duna nos, e deber con pa actua y e mester forsa Gobierno pa cumpli cu su deber”, Parlamentario Wever-Croes a expresa.
Segun e parlamentario, Presidente Sneek a priminti cu esaki lo pasa y a manda carta pa Gobierno indicando cu awo si Gobierno mester acudi na reunionnan dentro di 30 dia y cu Gobierno mester contesta preguntanan di Parlamento. Ya 20 dia a pasa y no a tende nada ainda.
“Nos tin pa wak, nos no a yega 10 di april ainda. Pero te ainda niun minister a reacciona riba e carta tampoco. Mi ta haya cu Gobierno ta faltando respet na Parlamento y nos Presidente di Parlamento ta falta curashi pa pone Gobierno para strit”, Parlamentario Wever-Croes a enfatisa.
