Parlamentario Eduard Pieters (PPA):
ORANJESTAD (AAN): Den un momento di presion economico creciente, parlamentario Eduard Pieters di fraccion di PPA ta bati un alarma fuerte: costo di bida na Aruba ta subi di forma alarmante, mientras gobierno ta keda den un silencio peligroso.
Durante un conferencia di prensa reciente, Pieters a pone e realidad suno dilanti: pueblo di Aruba ta ricibi “sla tras di sla” cu aumento semanal y mensual, sin ningun plan cla di gobierno pa proteha nan.
Crisis mundial, impacto directo na Aruba: E situacion global no ta yuda. Crisis di guera na Medio Oriente ta pusha prijs di petroleo na un nivel alarmante, ya pasando 100 dollar y cu pronostico pa yega te 150 dollar pa bari. Pa un isla cu ta depende riba importacion, esaki tin consecuencia inmediato. Un di e prome impactonan cu ya nos lo bay sinti despues di 12 di april: aumento di 25% den costo total di flete, segun sector comercial (King Ocean).
Esaki ta significa un cos: tur producto lo bira mas caro. “Pueblo ta biba den incertidumbre total,” Pieters a indica.
Silencio di gobierno: falta di liderazgo: Mientras e paisnan manera Corsou y St. Maarten a reacciona cu e medidanan concreto, na Aruba ta reina un silencio hermetico. Gobierno no ta informa pueblo: (*) Kico ta pasando. (*) Kico ta e impacto. (*) Ni kico ta e plan pa mitiga e daño.
“Esaki ta inaceptabel,” Pieters a declara. “Gobierno mester lider y no keda keto, mientras pueblo ta sufri.”
Promesa sin accion: Segun Pieters, por mira cu AVP y Futuro ta fayando pueblo. Durante campaña electoral, tanto AVP como Futuro a priminti cu nan lo baha costo di bida. Awe, despues di mas cu un aña na poder, realidad ta otro: No tin plan, no tin vision y no tin accion concreto. “Cada siman nos ta mira aumento drastico,” Pieters a bisa. “Pueblo no por carga e peso aki mas.”
Sistema fiscal ta castiga pueblo, y pesey segun Pieters, un di e causanan principal di e aumento continuo ta e sistema di BBO, cu ta funciona acumulativamente. Cada aumento internacional ta multiplica door impuesto local.
Resultado di esaki ta cu Pueblo ta paga mas y gobierno ta gana mas. “Ken ta beneficia? Gobierno,” Pieters a enfatisa. “Mientras pueblo ta sufri, gobierno ta ricibi mas ingreso.”
Solucion ta existi, pero falta boluntad: PPA no ta solamente critica, nan ta presenta solucion: Cambio di BBO pa BTW y elimina BBO riba flete y invoerrechten riba producto basico. Incluso, un comerciante respeta den comunidad, manera sr. Saladin, a propone un solucion practico: no cobra BBO riba flete y invoerrechten, esaki ta pa evita cu costo di transporte cu lo aumenta ta pasa directo pa consumidor.
“Gobierno tin poder ehecutivo pa haci esaki awe mes,” Pieters a declara. “Pero falta boluntad.”
E ta mira cu aki tin un gobierno cu ta lubida su pueblo: Segun Pieters, ora un gobierno ta mira cu pueblo ta sufri, pero no ta actua, esaki ta mas cu negligencia. “Si bo sa cu pueblo ta sclamando y e prijsnan ta subi siman tras di siman, pero bo no ta haci nada, bo ta abusando di pueblo,” el a bisa contundente.
PPA ta exigi responsabilidad: Fraccion di PPA ta yama tanto Minister di Finansa, Geoffrey Wever, como Minister Presidente, Mike Eman, pa duna cuenta na pueblo: Kico ta e plan concreto? Con lo mitiga e aumento? Con lo proteha y alivia pueblo? “Liderato no ta palabra so, sino accion,” Pieters a conclui.
