Parlamentario Jennifer Arends-Reyes
ORANJESTAD (AAN): Parlamentario di AVP, Sra. Jennifer Arends-Reyes, ta pone atencion riba e revelacionan preocupante den e Rapport di ARA 2020, caminda ta sali na cla cu durante e crisis di COVID-19, e programa FASE no a funciona manera mester ta y hopi pago a sali sin mester of traha incorectamente. Ta un echo cu tin hende a cobra dobel, diferente pago riba mesun cuenta of a paga hende cu a fayece, y hasta a bisa pa vota pa nan partido si kier pa e pagonan continua.
E ta algo cu kizas oposicion no kier tende, algo cu no tin nada di haci cu cualkier personal di cuido of otro sector cu a carga Aruba; al contrario, e ta pa trece concientisacion cu, nos como pais, mester prepara mihor. Ambtenaar y semi-ambtenaarnan a entrega 12,6% den solidaridad pa yuda cu FASE. Un iniciativa di gobierno di e tempo ey. Hulanda cu a fia Pais Aruba 900 miyon florin pa cubri resto di gasto di Aruba mientras turismo a cay afo, no a ria dos biaha pa exigi pa nos hendenan paga esaki bek y na interes hopi halto.
Segun Arends-Reyes, e situacion di con a maneha fondo cu a haya di solidaridad den tempo di crisis no ta solamente un asunto administrativo, pero un señal serio cu Aruba mester re-evalua con nos ta organiza y controla mecanismo di emergencia ora calamidad ta yega.
“Nos ta papia di famia cu tabata depende riba e yudansa aki pa por paga nan gastonan basico. Si un programa di emergencia no ta ehecuta cu disciplina, claridad y control, e pueblo ta sufri dos biaha: un biaha pa e calamidad mes, y otro biaha pa e maneho deficiente,” Arends-Reyes a expresa.
E rapport di ARA a mustra cu tabatin debilidad serio den control interno, documentacion, y siguimento di pago. Esaki ta laga pregunta habri riba con a tuma decision, con a valida beneficio y con a maneha e supervision durante e implementacion di FASE.
Parlamentario Arends-Reyes ta enfatisa cu Aruba no por permiti cu un situacion asina ripiti den futuro, specialmente considerando cu calamidad natural, crisis economico, of pandemia ta keda un realidad cu nos mester ta cla pa enfrenta na cualkier momento.
“Nos mester fortalece nos sistema di preparacion pa calamidad. Esaki ta inclui un cuadro legal cla, un sistema digital transparente, controlnan independiente, y un protocol fiho pa paga y validacion. Preparacion no ta algo opcional; e ta proteccion di nos pueblo,” Arends-Reyes a agrega.
Sra Arends-Reyes ta insisti cu gobierno mester tuma les di pasado y implementa reformanan structural, manera:
- control financiero y auditoria continuo durante crisis,
- transparencia publico riba distribuimento di fondo,
- y un mecanismo di evaluacion rapido pa evita fraude.
Arends-Reyes ta conclui cu Aruba mester traha riba un sistema moderno y confiabel cu por actua lihe, pero cu e mesun rapidez ey no por ta a cambio di ordo, responsabilidad y husticia.
“Calamidad no ta un excuus pa caos. Calamidad ta hustamente e momento caminda gobierno mester mustra liderazgo, ordo y proteccion pa su pueblo,” segun Arends-Reyes.
