ORANJESTAD (AAN) – Parlamentario Edgard Vrolijk a toca e tema di Enseñanza, den conferencia di prensa di fraccion di MEP,
den cual a subraya cu e ultimo casi cuater añanan di gobernacion, tabata tin turbulencia y disgusto riba tereno di educacion escolar.
Vrolijk a referi na e preocupacion cu a reina den Enseñanza, durante e casi cuater añanan cu a pasa, unda a surgi turbulencia, manifestacionnan, y hopi biaha pa falta di comunicacion y, sigur, falta di dialogo.
E Parlamentario a comenta cu el a sinta varios biaha cu docentenan y nan preocupacion ta genuino. Ketobay tin decisionnan cu a wordo tuma cu ta haci daño na nos enseñanza.
Vrolijk a indica cu el a bisa e docentenan cu na momento cu dia 25 di Juni yega, ta den nan man pa vota pa un persona cu nan ta kere cu por reorganiza y trece trankilidad bek den enseñanza, pa asina ey por trece cambio real.
“Pasobra na e momento aki tin hopi turbulencia y disgusto, y ora bo tin hende los cu bo no tin nan cu bo, dificilmente por trece cambio. E prome stap den un proximo gobernacion ta trece trankilidad den tur cos, cu na e momentonan aki ta creando panico, pa asina bo evalua y hunto cu e grupo aki den un combersacion, cu un dialogo amplio cu esnan cu tin conocemento, esnan cu ta traha den veld, por traha un plan structural, pasobra nos tur sa cu mester bin cambio, y mi ta kere cu ta humano tambe pa ora cu tin cambio hacie na un manera structura y nechi, unda tur hende tin parti den dje y ta na haltura di dje”, segun Edgard Vrolijk.
El a agrega cu naturalmente, pa miho cu e cambio por ta, e no ta bay si esnan den veld no tin e filling pa cargu'e. El a splica tambe cu den e siman aki of otro siman, den e transcurso di e dianan e ta bin cu e proyecto cu e ta trahando riba dje hunto cu Prome Minister pa e parti di Innovacion.
“Nos ta wak cu Cacique Macuarima Scol a bira un scol completamente innovativo. Nos a bay Pastoor Kranwinkel, Aterima Kleuterschool y na e momento aki nos ta bay topa otro scol na Playa. Nos no ta anuncia su nomber ainda, pero e ta un scol na Madiki”, e parlamentario a indica.
