ORANJESTAD (AAN) – Parlamentario Edgard Vrolijk a referi na e reunion publico reciente, tocante RDA,
y tambe a elabora riba e tema di enseñanza, den e conferencia di prensa di Fraccion di MEP, Dialuna 17 di Mei aki.
Vrolijk a menciona cu e reunion publico tocante e Refineria de Aruba (RdA), e hunto cu e fraccion di MEP a pidie, y a invita Prome Minister pa e aclarea kico a sosode den dicho instancia.
E parlamentario a menciona cu tin hopi hende pendiente di e contestanan pero e di dos tanda falta ainda.
Sinembargo, e ta kere cu un di e puntonan mas importante pa sali for di dje ta e investigacion, estudio y sigur e “Code Good Governance” cu mester wordo implementa mas pronto posible. El a subraya cu e rapport ta hopi importante, pa loke a pasa na RdA, no sosode nunca mas.
E ta califica Richard Arends y Mike de Meza como dos autornan intelectual di loke a sosode na RdA, unda tabata tin un “bagamunderia total” Vrolijk a bisa. Un di e preguntanan cu a keda den laira, segun e parlamentario, ta kico ta bay pasa cu esnan cu a nenga di coopera y cu esnan cu a contribui cu e situacion.
El a reitera cu locual a pasa na RdA no por sosode nunca mas y cu esaki ta un les pa gobierno y parlamento, y pa tur compania NV, cu cierto cosnan manera a pasa na RdA no por wordo permiti hamas, pasobra ta daño nan ta haci e pais; pasobra un compania cu mester percura pa crea entrada pa Pais Aruba, a dispidi esaki cu amigo y compinchenan, un hende cu por topa bao palo mes, por a haya un contrato cu RdA, y esey no ta esencia di locual ta un compania estatal.
Fraccion di MEP ta keda pendiente di e siguiente reunion, ora cu Presidente di Staten Ady Thijsen yama e di dos tanda, pa sigui elabora riba RdA ya cu tin hopi mas punto pa trata, tocante loke a sosode.
Tambe nan ta pendiente riba loke Ministerio Publico ta bay bisa encuanto e rapport forensic, cu actualmente ta den man di OM, pa nan haci nan investigacionnan, si tin procedurenan civil of por sigui nan caminda. El a spera esaki sosode pronto pasobra pueblo merece un contesta riba esey.
