Michella Steenvoorde-Lacle riba lista di MEP kier sirbi pueblo cu sinceridad y determinacion

ORANJESTAD (AAN): Dialuna atardi, Partido MEP a presenta candidato riba lista di MEP, Michella Steenvoorde-Lacle. Michella ta casa y ta mama di dos yiu. Un persona humilde di curason y cu fe den Dios.

   “Mi ta pensa cu El a manda mi na e mundo aki cu un proposito. Mi proposito ta di sirbi mi pueblo cu sinceridad y determinacion”.

   Michella ta bin di e mundo di enseňansa sin embargo a desaroya su mes den diferente area y disciplina. Areanan manera desaroyo y implementacion di maneho. Na aña 2018 Michella a worde acerca pa e actual Minister di Husticia pa join su team como consehero. Y eynan el a desaroya e proyecto Voortgezet Ouderschap o sea Mayor bo ta pa semper. Un concepto di ley cu tin su origenan na madre patria, y ta encera cu mayornan lo mester traha un PLAN DI MAYOR prome cu nan separa. Esaki ta pa salvaguardia e derechonan fundamental di nos muchanan cu ta ancra den tratadonan di derecho internacional di mucha di nacionan uni.

Den futuro mayornan cu ta pensa di separa, por bay na un luga caminda nan ta haňa e guia necesario pa haci esaki teniendo nan yiu central y cu e daňo minimo pa e mucha.

   “Mi a scoge Partido MEP pasobra mi a wak di cerca con e ekipo a traha ora bo ta den medio di e wowo di e horcan. Esaki ta loke e crisis di COVID-19 tabata! E ta rekeri un ekipo di profesional cu no solamente tin e estudio y capacidad, pero cu por tin e serenidad y e control emocional pa maneha un crisis di e magnitud aki. Mi wowonan a habri y pa mi ta un honor pa por worde accepta den e partido cu mi difunto abuelo a yuda funda. Un partido di homber y muhernan balente cu a sa di construi e Aruba cu nos ta biba aden awendia, cu a sa di reforma e kiesverordening pa asina permiti mas hende participa na e sistema democratico di laga bo voto conta. Nos lo duna honor na nan legado y sigui cu pasonan firme y determina pa logra cambionan importante pa e generacionnan cu ta bin despues di nos. ‘For we will plant trees under which's shadow we will never sit. But we will do it for our children’.

   Si bo tambe ta di acuerdo con nos Minister President Evelyn Wever-Croes a enfrenta tur e retonan di magnitud gigantesco. Si abo tambe a wak cu e tabata e serenidad den medio di e horcan, e lider firme cu a saca nos foi di e wowo di e tempestad cu e crisis di COVID-19 a bin cu ne. E poder ta den Bo.

   Den nomber di Partido MEP, Lider di MEP, Prome Minister Evelyn Wever-Croes a yama bon bini na Michella y a desea exito den e ultimo simannan di campaña y exito den Eleccion 2021