ORANJESTAD (AAN): Nos muchanan tin derecho pa tin ambos mayor den nan bida, e derecho aki ta worde ancra den e tratadonan internacional di mucha, tratado di UNICEF cu Aruba tambe a ratifica na aña 2001.
Nos muchanan tin derecho di haya alimentacion, den caso di un separacion, nos muchanan tin derecho di haya esaki di ambos mayor. Nos muchanan tin derecho pa worde scucha. Y asina nos muchanan tin hopi otro derechonan mas, den total tin 54 articulonan di derecho di mucha.
Pa yega na conclui e Proyecto “Voortgezet Ouderschap Aruba” (Mayor bo ta Pa Semper) un sondeo hunto cu Centraal Bureau Statistiek Aruba a worde haci.
Estudionan prome cu esey a duna nos un bista di kico ta e situacion di nos muchanan actualmente riba e tematica aki. A sondea entre otro.
(1) Cuanto divorcio tin na Aruba? Y cuanto mucha tin envolvi?
(2) Cuanto ta e cifranan di mayornan cu mester acudi nan instancianan manera Voogdijraad y/of Corte pa por busca derecho di alimentacion pa nan yiunan?
(3) Con bureau leerplicht ta registra ausencia di muchanan na scol, si nan categorisa esakinan, por ehempel “ausente paso mayornan ta separando”
(4) Con e trahadonan social ta registra ora un mucha bay atras den scol, of actitud si nan ripara cu e mayornan ta pasando den un separacion? Kico nan tin prepara pa e grupo di muchanan aki?
E contestanan na tur pregunta tabata alarmante. Esaki ta un di e motibonan pa cual mi ta pone mi mes disponible cu determinacion. Mi lo traha riba e maneho y trece solucion definitive, cu contenido pa e problematicanan aki. Cu un vision y mission cu a resulta exitoso na otro paisnan, formula cu ta conta cu aprobacion di Nederlandse Jeugd Instituut y e rapport di Kinder Ombudsman. Adaptando e na Aruba su costumbernan y cultura. E Proyecto di ley pa Plan di Mayor Obligatorio ta escencial pa nos comunidad henter y nos muchanan en especial.
“Mi kier a pidi Dios danki pa pone e vision aki den mi curason, y conectami cu e personanan corecto y den e posicion pa por obra. Un agradecimiento na Minister Andin Bikker y Minister Glenbert Croes pa sostene e propuesta di ley pa Plan di Mayor obligatorio pa mayornan cu ta bay separa,” Michella Steenvoorde-Lacle cu ta nobo riba lista di MEP a bisa.
Sin lubida e team di expertonan cu a forma parti di Comision Voortgezet Ouderschap Aruba, cu di inicio a sa di trece e expertonan corecto hunto.
