ORANJESTAD (AAN): Den un carta habri dirigi na Lider di Partido AVP, Mike Eman, Geoffrey Wever, #2 di Partido RAIZ a expresa: "Como futuro miembro di Parlamento di Aruba mi ta dirigi mi mes na Bo persona cu e siguiente peticion.
Dia 7 di Juli 2021 Aruba lo conoce un constelacion parlamentario nobo. P'ami como parlamentario nobo ta un gran honor pa por carga e responsabilidad aki. E carta aki no tin como intencion pa crea mas division entre e partidonan, ni entre nos ciudadanonan. Esaki ta un peticion na Bo persona, como lider di oposicion, como di dos vote-getter di pais Aruba y como un persona cu pa 8 aña largo tawata Minister Presidente di nos pais.
Mi ta hañando hopi reaccion di personanan den nos comunidad cu ta sumamente desapunta cu señor
Benny Sevinger lo huramenta e siman aki como parlamentario. Mi ta comparti e sentimento aki.
E realidad huridico ta cu señor Sevinger ta inocente te ora un hues imparcial dicta cu señor Sevinger ta culpabel di a comete actonan criminal, locual na e momento aki no ta e caso. E principio fundamental aki ta conta pa cualkier hende den nos comunidad, pero den mi pensamento personal no pa un politico den funcion. E politico tin cu duna ehempel y tin e responsabilidad di educa y representa e votador. Como politico nos mester particularmente inspira y guia nos hubentud y demostra kiko ta lo corecto.
Si señor Sevinger huramenta como miembro di Parlamento di Aruba esaki lo ta un mancha scur den historia politico di Aruba cu nunca mas nos por elimina y lo ta un mal señal pa nos hubentud. Pa e motibo nan menciona ariba mi ta puntra Bo persona pa haci lo corecto y pidi señor Sevinger pa no acepta su nombracion como miembro di Parlamento di Aruba na e momento aki y warda e proceso legal termina, pa asina nos restaura e confiansa di e votador den politica.
Lo ta lamentabel si e constelacion nobo di Parlamento di Aruba mester bin cu legislacion a base di cual ta suspende un parlamentario ora e ta den detencion preventivo, manera prescribi den articulo 50, inciso 2, di Constitucion di Sint Maarten of cualquier otro ley, en bes di cu señor Sevinger tuma e decision aki su mes.
Personalmente mi ta kere si cu mester cambia e sistema legal di tal forma cu un politico no por wordo persigui por ehempel 1 aña prome cu eleccion y si e wordo persigui, su caso mester wordo trata na un forma rapido pa evita cu un politico ta keda den un incertidumbre; como parlamentario mi lo duna mi sosten na un cambio di ley asina.
A base di lo anterior, mi ta spera señor Eman por considera pa papia cu señor Sevinger y pidi señor Sevinger pa no acepta su nombracion como parlamentario den e constelacion parlamentario nobo y warda e proceso legal termina prome cu señor Sevinger tuma su asiento den Parlamento di Aruba. Un decision asina lo ta den beneficio di henter pueblo di Aruba.
Saludos cordial,
Geoffrey Wever
