ORANJESTAD (AAN): Lider di Partido MAS, Marisol Lopez-Tromp a reuni cu Eddy Werleman y Tisa Lasorte den nan funcion di Informador.
Despues di e reunion, Lopez-Tromp a duna su impresion riba con e reunion aki a bay. El a expresa cu esaki tabata un reunion confidencial y e invitacion ta trece pa dilanti cu nan tin e tarea pa bay sondea ki posibilidadnan tin pa un posibel formacion cu un base mas amplio. Y den e caso aki pa tene na cuenta cu tin un landspakket y puntonan hopi urgente cu lo tin cu bay wordo trata.
A base di esaki e conversacionnan a wordo hiba y e intension pa dialuna tabata un prome conversacion unda a haci preguntanan y a puntra pa cierto informacionnan.
Segun e lider di MAS, no tin ningun palabracion cu otro partidonan. MAS a keda contento cu e resultado di eleccion di 2 asiento y cu pronto ta bay tin un Parlamento cu ta bay forma e siman aki, a enfatisa.
Pa loke ta e reunion cu tabata tin cu Accion21, el a laga sa cu como partido el a duna oido na e invitacion di Miguel Mansur ya cu durante campaña no tabata tin chens pa papia ni pa conoce otro.
Tabata importante pa cada un expresa e opinion riba e resultado di eleccion, a señala.
