Awor no mester di partidonan cu no tin stabilidad - ORANJESTAD (AAN) – Despues cu prome minister demisionario, Evelyn Wever-Croes a reuni cu e informadornan den su calidad di Lider di Partido MEP, el a topa cu varios pregunta for di prensa.
Un miembro di prensa a puntra e lider di MEP, kico ta su opinion tocante loke ta pasando internamente, den dos partido politico nobo, cu tambe a haya asiento den Parlamento, esta Accion21 y MAS.
E contesta di Wever-Croes ta cu pa Partido MEP, stabilidad ta hopi importante. El a bisa cu durante e ultimo gobernacion nan a pasa den momentonan hopi turbulento, y a purba di tine mas trankil posible, pero ora e partnernan den coalicion no ta stabil y nan tin hopi problema interno, esaki ta afecta henter gobernacion.
“Y el a afecta nos partido nos partido mahos tambe, durante e ultimo coalicion. Pues, nos ta buscando realmente un partner stabil, cu bo por goberna cune y no un partner cu bo tin cu wanta e golpi, ora nan ta cuminza pleita internamente. Ora bo mira kico a pasa e ultimo dianan aki, e ta duna mi preocupacion berdad, sinembargo, mi ta kere, ta asuntonan interno di cada partido, cu nan mester atende cune”, e lider di MEP a subraya.
E dignatario a remarca cu na e momentonan aki, Aruba tin un presion financiero-economico sumamente grandi, cu hopi hende desemplea, pues esaki no ta momento cu mester di partidonan cu no tin stabilidad.
