Partido MEP
ORANJESTAD (AAN): Den 10 aña, Mike Eman a demostra di a logra algo hopi grandi na fabor y beneficio di nos pueblo. Den 10 aña, desde 2013, Mike Eman a logra baha e cantidad di asiento den Parlamento di 13 pa 5 asiento na 2023, un total di 8 asiento. Y si e tendencia coruptivo pesisti den e Partido di Mike Eman, esaki lo yega na 4 asiento pronto. Pero e logro aki di Mike Eman, ta un marca di un lider fracasa. Un lider sin ambicion pa integridad.
Den Partido AVP a cuminsa existi tendencianan coruptivo den gobernacion pa algun aña caba. Ministernan di e partido berde a comete y a wordo huzga y haña culpable di hechonan coruptivo y asina mes, como lider di e partido, Mike Eman a keda brasa e tendencia aki duro poniendo su asientonan den peliger.
Den e ultimo caso di Avestruz, Mike Eman a prefera pa duna prioridad na integrante corupto di su partido, Benny Sevinger, un posicion riba lista pa drenta Parlamento, poniendo no solamente Parlamento di Aruba na berguensa, pero poniendo Aruba su cara na berguensa cu un sospechoso di corupcion den Parlamento.
Mike Eman a haña chens pa drecha esaki despues di e huicio di Benny Sevinger, pero Mike Eman a considera cu un tiki corupto no ta hopi corupto y a duna prioridad na Benny Sevinger un biaha mas den su partido, brasando Sevinger mas duro ainda mientras e ta para wak parlamentarionan, candidatonan y sostenedornan kita y bandona su partido.
Esaki, pa Partido MEP sigur ta un señal cu Mike Eman a fracasa como lider di Partido AVP. Un lider sin integridad. Un lider cu e mes a ricibi placa ilicito pa haci su campaña. Mike Eman tin tur cualidad di un lider fracasa, un lider sin integridad, un lider sin rumbo, un lider sin capacidad pa haci loke ta corecto pa keda cu su asientonan.
