Partido MEP na Armand Hessels: MEP no ta competi cu AVP den nada
ORANJESTAD (AAN): Partido MEP un biaha mas a tuma nota di expresionnan y atakenan di Armand Hessels contra integridad di nos partido. Partido MEP ta informa señor Hessels cu ningun momento den trayectoria di e dos partidonan, por compara Partido MEP cu e Partido AVP. Aki na Aruba, tur hende sa cu AVP ta academia di corupcion y ta practica, instrui y gradua pa corupcion riba tur nivel.
Señor Hessels, manera tur hende, tambe ta wak e tendencia aki di corupcion di e partido di Mike Eman. Pero señor Hessels ta keda ignora e practica di corupcion y falta total di integridad di e partido berde. Pero cu keda ciego na e instituo di corupcion di AVP, no kiermeen cu por compara nos partido prestigioso cu Partido AVP.
Pregunta cu Partido MEP tin na Hessels ta, dicon ta e so no ta wak e tendencia di corupcion den AVP. Cu esaki tambe, Partido MEP ta pensa cu ta tempo pa Hessels retira. Nunca Hessels por a mira e panorama politico cu un bril obhetivo. Semper el a defende AVP apesar di tur corupcion di e partido berde. Y awor na final di su carera, atrobe Hessels ta defende y compara Partido MEP cu e Partido AVP cu ta un academia di corupcion.
Hessels no ta wak con AVP ta brasando te ainda corupcion siendo cu MEP ta rechasa corupcion. Den AVP e politico corupto ta wordo premia y brasa, den MEP e
Politico corupto mester retira. AVP kier cambia ley pa acomoda politico corupto y tene nan na mando. MEP a Bin cu ley pa obliga e politico corupto pa retira. AVP no a haci nada riba e tereno pa combati corupcion. Pasobra con nan por, si nan tin corupcion bon duro brasa? Al contrario, Partido MEP, bou liderazgo di Lider Evelyn Wever-Croes, ta esnan cu den historia di pais Aruba a haci enormemente hopi pa logra mas integridad na Aruba. Ta bon pa recorda Hessels di tur esaki:
1) Lider di MEP a institui Bureau Integriteit Aruba, algo unico na Aruba y den Reino.
2) Pa companianan estatal a introduci Corporate Governance Code
3) A traves di e Comision pa fortifica nos sistema democratico, cu nos lider a institui, ta traha riba independisacion di nos institutonan halto di estado
4) Introduccion di ombudsman
5) Ley di screening y integridad di ministernan
6) Ley di financiamento di partidonan politico
7) Introduccion di e wever-croes-norm
8) Gobierno a contribui financieramente cu 100 mil florin na e “National Integrity Scan” cu a wordo haci pa prome biaha na Aruba, hunto cu Saxion University, Universidad di Aruba y Hessels mes; y a base di e recomendacionnan awor Minister di Integridad Ursell Arends ta trahando un strategia di integridad
Esakinan ta apenas algun di e pasonan grandi tuma riba tereno di integridad desde cu Evelyn Wever-Croes a bira minister president, y cu ta logronan di su propio esfuerso. Nunca antes den historia di nos pais, asina tanto a wordo haci riba e tereno aki.
Cu e lista di loke MEP a haci riba e tereno di integridad y pa combati corupcion, y e lista di AVP cu ta contene practica, con pa haci corupcion, con pa brasa corupcion, con pa halsa corupcion y acomoda politiconan corupto, no por haci comparacion algun entre MEP y AVP. MEP ta keda un Partido integro mientras cu AVP ta pasa pa historia di nos pais como e Partido mas corupto, e partido cu ta brasa corupcion. Pues e comparacion y atakenan di Hessels sigur no ta na su luga!
