ORANJESTAD (AAN): E biaha aki no por entrega lista di Candidato di Partidonan Politico na e sistema tradicional mas.
Pues nada di Parada, cu musica, hende canando cu bandera tras di otro, pa yega Stadhuis cu e lista di partido.
Pues e eleccion di 2021, pa entrega di lista tambe lo tin adaptacion. Esey ta loke President di Conseho Electoral, Glenn Thode a indica durante un Conferenica di Prensa virtual via Microsoft Teams.
El a bisa cu e biaha aki, Partidonan Politico por djis manda nan lista cu tur detaye electronicamente via un email address special cu nan lo duna.
Of si acaso kier entrega e lista fisicamente, e ora maximo 2 persona di Partido Politico por bin haci esey.
“Pa entrega fisico lo bay cu minimo di persona envolvi, y lo tin di haci cita pa evita cu tin aglomeracion di hende, y reduci chens di contagia cu virus,” Thode a indica.
Segun Thode, e eleccionnan adelanta di 2021 a pone hopi presion riba logistica. Por ehemplo, tabatin ya caba cita traha pa Stadhuis na Playa, cu e.o. matrimonio. Pues net riba e dianan ey, a pone cu mester a haci cambio pa evita aglomeracion di hende pa reduci brote di Covid-19.
