Pueblo a aproba maneho di Evelyn Wever-Croes y su partido - AVP a bay atras cu 2 asiento
ORANJESTAD (AAN): E ta nifica algo simple! Aruba a aproba e maneho di Prome Ministro Evelyn Wever-Croes, y a vota Diabierna na un forma caminda e isla ta casi full geel.
Den eleccion 2021, votadornan a dicidi na amplia nan sosten na un forma unda na casi tur urna electoral, nan a crece. Lider di MEP, Evelyn Wever-Croes a relata Diabierna anochi laat cu e ta hopi satisfecho cu e resultado. Prome conclusion ta cu MEP a keda wanta su 9 asientonan, AVP ta e partido cu a cay cu 2 asiento.
AVP a bay atras y perde hopi. Esaki por nifica cu Aruba a rechaza e partido cu ta envolvi den asina hopi caso di corupcion na nivel gubernamental, y demas actonan cu cu AVP ta envolvi aden. Ainda por corda ora cu e lider di AVP den Gobierno tabata cana rond cu numeroso coordinador, incluyendo monton di fotografo riba payroll.
Na eleccion di 2017, Partido AVP a perde 4 asiento, y Diabierna anochi pa 2021 nan a perde 2 asiento mas. E caida drastico aki sigur ta unda Mike Eman tin di bay saca su conclusion pa cu e perdida aki, y digesti ki mensahe pueblo a manda pe.
Den eleccion aki, e sorpresa di hopi ta con grandi partido RAIZ a bira, como cu nan a haya 2 asiento. Un fenomenal trabao di Ursell Arends cu Partido RAIZ a sa di trece dilanti na pueblo, na un forma original ‘down to earth’ e mensahe cla y raspa na pueblo. E campaña tabata uno diferente y special cu RAIZ ta orguyoso di dje.
Partido MAS di drs. Marisol Lopez-Tromp tambe a saca 2 asiento den e eleccion aki. Esey ta demostra cu e respaldo di e ex-Ministro aki ta grandi pa un partido di solamente 7 persona riba lista, specialmente entre hubentud cu desde e espectaculo di ‘Segunda Tanda’ den Parlamento, a sa di admira su estilo cla y raspa di defende su maneho.
Miguel Mansur di Partido Accion21 tambe a sobresali na su forma unico di hiba campaña, y a logra di bay cu 1 asiento tambe.
E resultado aki ta indica cu e Gobierno nobo di Aruba lo bay bira uno di coalicion.
