Mensahe corto despues di no a logra asiento
ORANJESTAD (AAN): Diasabra atardi, Ryçond Santos do Nascimento a saca un video pa duna su reaccion despues cu den eleccion di Diabierna 6 di December 2024, su partido a obtene 1.349 voto di sostenedornan, pero lamentablemente esaki no ta suficiente pa un asiento den Parlamento. Esey nifica cu aki algun siman e lo tin di bandona Parlamento y keda afo.
Segun do Nascimento, e ta gradici tur votador riba lista di Partido LpR y cada persona cu a deposita nan confiansa den mensahe pa norma y balor, mensahe contra corupcion, mensahe economico cu un vision claro pa controla costo di bida.
E ta gradici tur hende den team di Partido Lucha pa Reforma, e candidatonan, esnan den fundacion pa e parti financiero, y nan media team cu a yuda cu den tempo cortico nan a pasa for di Partido cu ningun hende tabata conoce, y awe Partido LpR ta un nomber conoci den comunidad. Pues palabra di gradicimento na tur.
E ta spera cu ta confia Dios, y confia cu tur cos ta den man di Señor, y asina confia cu e futuro di e pais aki ta den Su man. Di parti LpR, nan den nomber caba ta skirbi cu nan ta lucha, pues ta kere cu tin derecho di existencia pa e cantidad di voto cu nan a haya den prome salida, cu un politica diferente, cu apoyo cu tabata creciendo tur dia. Ta realmente convenci cu tin un espacio den e arena politico pa LpR cu tin un signatura conservativo, signatura centro-derecha, y signatura cristian democrata.
El a indica cu pueblo lo sigui tende mas di dje, y tambe di LpR.
