ORANJESTAD (AAN): Evelyn Wever-Croes, lider di Partido MEP a duna di conoce riba diasabra cu despues di 7 aña di gobernacion, y despues di 2 gobierno di coalicion,
MEP a mantene nan forza como e partido mas grandi den 4 di e 6 districtonan di Aruba: Noord, Paradera, Santa Cruz y Savaneta. Y a mantene 8 asiento, perdiendo solamente 1 asiento. Esaki so caba ta un logro historico.
El a expresa palabranan di danki na e 17.572 personanan cu a deposita nan confiansa den partido Movimiento Electoral di Pueblo. "Danki pa kere y reconoce nos liderazgo", el expresa.
"Analisando e resultadonan di eleccion, mi por bisa cu realmente MEP a perde 3.174 voto, 15%, so. Algo historico despues di 2 gobernacion, mirando cu den pasado despues di 2 gobernacion e partido cu a goberna, semper a perde mas cu esey. E resultado pues ta refleha mas bien un cierto desgaste, pero mes momento tambe un confirmacion di e forma di lidera nos pais.
Partido AVP tambe a bay atras den voto, pero a crece den asiento.
Partidonan Futuro y PPA : pabien cu e resultado!
Partidonan Raiz, MAS y Accion21 a perde nan representacion den Parlamento.
Un resultado cu poco a spera, un veredicto cu nos tur mester biba cu ne. Ami ta satisfecho mirando cu nos a mantene 4 di 6 districto", Evelyn Wever-Croes a declara.
