E lider Leonardo Figaroa a confirma
ORANJESTAD (AAN): E ta un partido nobo cu a worde lanta algun tempo pasa, y e lider Leonardo Figaroa a bin ta trece varios punto dilanti den prensa riba nan pensamento pa cu situacionnan actual na Aruba y den gobernacion.
Pero awor a sali na cla, cu nan lo no participa den eleccion di Parlamento na Aruba cu a ser stipula pa Diabierna 6 di December 2024.
Diahuebs merdia, Figaroa a splica cu e y tambe Partido Direccion Politiea a manda informa Conseho Electoral di Aruba mediante un carta cu nan lo no ta participando na e eleccion benidero di 6 December 2024.
El a indica cu debi cu Gobierno a cay y cu eleccion rapido a wordo yama, a pone cu Partido PDP no ta cla financieramente pa participa. Pesey a tuma decision pa no bay eleccion.
“Mi kier a usa e espacio pa primeramente, gradici e mundo di prensa cu semper man habri a sa di sostenemi pa por informa Aruba riba kico tabata e puntonan di preocupacion cu nos tabatatin. Mi kier a extende palabra di gradicimento na tur persona cu a y ta sigui kere den e vision di PDP, na e personanan cu a sa di extende nan ayudo di e prome dia. Mi sa cu hopi persona tabatatin deseo pa wak PDP yega eleccion, pero nos como organizacion mester tuma un decision pensando riba e interes y bienestar general di Pais Aruba.”
El a confirma cu mirando e hecho cu e periode di eleccion ta asina cerca, organizatoriamente y financieramente e ta presenta retonan cu aworakinan como organizacion no ta alcansabel mas pa por presenta un organizacion solido cu por brinda e confianza na e electorado pa ta un opcion real pa e grupo cu ta determina pa vota pa algo diferente.
Figaroa a sigui bisa: “Personalmente, e decision aki ta kibra mi curason, pero tin ora como un lider bo tin cu acepta cu e circumstancianan no ta faboral y esey ta pone cu bo tin cu haci un reflexion profundo riba ki impacto bo decision lo tin pa Aruba.”
Leonardo Figaroa a indica cu su compromiso cu hobennan, studiantenan, muchanan y pueblo di Aruba no a termina. Pa awor e lo mi enfoca completamente riba su estudio.
El a inida sinembargo cu desde 18 di September e por yama mi mes un hurista cu su titulo di LL.B. , esaki sigur ta motiv’e mas pa por continua pa su grado di Masters pa asina por sigui profesionalisa su mes.
“Mi rol den politica lo ta uno diferente, pero mi sa cu e compromiso pa empoderacion lo continua. E decision aki no tabata uno fasil pa ningun di nos, pero na final di dia como politico mi ta haye mas importante pami por keda cu mi normanan y balornan, cu mi por wak e electorado y por usa e palabra integridad. Aruba nos a purba na varios ocasion di presenta un alternativa diferente den forma di lista combina, pero esaki no tabata exitoso.
El a finaliza bisando cu esey ta forma un di e motibo primordial cu e organizacion a opta pa no forma parti di e eleccion benidero, conhuntamente cu retonan organizatorio y prioridadnan personal cu e ta hay’e confronta cune den e momentonan aki.
