Parlamentario Ricky Hoek (MEP) ta splica:
*Awe no tin gobierno y ta pasobra tin un causa
ORANJESTAD (AAN): Parlamentario di Fraccion di MEP, Ricky Hoek tabata invitado durante e programa radial di Sr. Johnny Habibe na Hit 94 FM diabierna atardi unda el a elabora riba e motibonan cu a conduci na e caida di Gabinete Wever-Croes II.
Hoek a indica cu e dia ey, Parlamento den su totalidad mester a vota pa e presidente nobo di Aña Parlamentario 2024-2025.
Partido Movimiento Electoral di Pueblo (MEP) den e acuerdo di gobernacion hunto cu Partido RAIZ tabatin e palabracion cu ta bisa cu Partido MEP ta apunta Presidente di Parlamento y Partido RAIZ ta apunta e vicepresidente. Manera semper, e presidente ta Sr. Edgard Vrolijk y e vicepresidente Sr. Raymond Kamperveen.
E parlamentario a sigui bisa cu den e caso aki Partido RAIZ a keda para riba cu nan no kier sostene Edgard Vrolijk.
"Awe no tin gobierno y ta pasobra tin un causa. E causa ey ta momento cu Misha Raymond di partido RAIZ, den un tratamento di ley publico, esta e ley di strafvordering caminda Minister Rocco Tjon a bin pa presenta e ley, Sra. Misha a abstene pa vota pa e ley ey y Sra. Misha a keda sinta den sala. Pues eynan tabata e momento cu tur hende a bisa cu si bo ta bay abstene di vota pa un ley, bo no ta keda sinta den sala. Bo tin cu bay bandona e sala y de facto ta wak cu bo a abstene", Ricky Hoek a expresa.
Misha Raymond a keda sinta den sala y el a abstene di vota pa e ley di strafvordering cu Minister Rocco Tjon a presenta. Pa evita cu esaki por a sosode ora di trata e ley di matrimonio di personanan di mesun sexo, Sr. Edgard Vrolijk a bay busca conseho huridico, si e miembronan di parlamento mag keda sinta den sala of mester bandona sala.
Den e caso di Sr. Vrolijk e no mester bandona e sala pasobra e mester guia e sesion y esey ta su funcion. Pero kico e otro miembronan mester haci si nan ta abstene. Si ta vota pro of contra esey no ta dificil. Pero si ta abstene, e ora mester tin claridad si mester keda sinta ariba stul of mester bandona sala di parlamento, a bisa.
Riba esey Sr. Vrolijk a busca conseho hunto cu Griffier y hefe di departamento huridico (DWJZ). El a trece e informacion na mesa y a yama un 'seniorenconvent', caminda e lidernan di e fraccionnan ta bini hunto den e reunion hunto cu presidente di parlamento y griffier pa dicidi kico ta bay haci.
"Esey ta e causa principal pakico a bin e momento, e mainta ey pa haci e cambio di votamento. Tur lider di fraccion tabata sa y na final nan a dicidi cu nan ta laga e votamento manera tur cos tabata cana semper". Esaki ta nifica cu no tabatin ningun cambio mas.
Ta conoci con e eleccion a bay y con e decisionnan a wordo tuma y cu e ley no a pasa.
Parlamentario Hoek ta haya cu pa caprichonan personal of inmadures politico Sra. Raymond a keda cu esaki aden cu e no ta haya leuk cu e ley no a pasa. Sinembargo, dia 12 di juli den cassatie a dicta cu aworaki tur persona di mesun sexo por casa na Aruba y inscribi na Censo y cu ta un logro di Stichting Orguyo cu a bringa pa esaki por a bira un realidad.
Dos dia prome cu eleccion di presidente di Parlamento, RAIZ a bisa cu nan no ta sostene Sr. Edgard Vrolijk.
Den su totalidad esaki tin dos aspecto den dje. Un ta cu no ta mantene na palabracionnan cu tin cu e partner den coalicion. Pero tambe kico ta haci cu democracia, cu integridad, cu e informacion y e imagen cu ta duna na pueblo.
Ora cu RAIZ a bisa cu no ta sostene Edgard Vrolijk, mester a vota pa un otro miembro di Partido MEP. Pero no a vota pa un miembro di MEP. A vota pa Raymond Kamperveen di RAIZ.
Parlamentario Ricky Hoek a expresa cu RAIZ ta bisa cu esaki no ta un complot. Pero si ta analisa bon un dia prome, lider di partido RAIZ mes a bisa cu si no kita Sr. Edgard Vrolijk, nan mes ta pone pa Sr. Kamperveen.
Sr. Arends a bisa esey publicamente y haci un yamado na oposicion bisando "esaki ta mi wega, esaki ta mi carta” y naturalmente oposicion ta den politica y a bay sostene RAIZ tambe, cu consecuentemente Gabinete Wever-Croes II y parlamento a keda disolvi.
