Partido Accion21 a presenta 3 candidato mas cu lo ta parti di nan lista politico

ORANJESTAD (AAN): Diaranson partido Accion21 a convoca un rueda di prensa unda nan lider, Miguel Mansur a haci introduccion di tres candidato nobo.

El a presenta Tony de Jonge un persona cu ta bin for di e veld di enseñansa y cu a cambia su carera pa asina yuda e muchanan. El a nace na Hulanda 54 aña pasa y na aña 2006 el a bin biba na Aruba despues di un periodo unda e mester a bay biba bek na Hulanda pa specialisa den su estudio di Historia y Geografia.

E otro candidato ta Raymundo Dijkhoff, kende ta un persona nada desconoci na Aruba pa su specialisacion den e area di arkeologia. Su areanan di interes ta cultura y tambe deporte, a bisa.

Finalmente, Miguel Mansur a introduci Mitchell Ho-Asjoe, cu ta un di e lidernan di e Grupo Ta Basta y co fundador di Stichting 'End Child Abuse'. Su intencion ta pa implementa un plan cu ta drecha e comunicacion entre e instancianan cu ta proteha e muchanan.

Diabierna awor, Accion21 lo presenta su lista completo durante e entrega di e lista pa Eleccion 2021 y Accion21 lo ta e prome partido politico cu lo haci esaki pa 9'or di mainta.