Presidente di Partido MEP, Hendrik Tevreden
ORANJESTAD (AAN): Presidente di Partido MEP, Hendrik Tevreden a indica durante conferencia di prensa, cu diabierna dia 7 di mei,
Partido MEP lo entrega lista victorioso pa eleccion di dia 25 di juni 2021. E biaha aki e entregamento di lista lo tuma lugar di un manera diferente, pero no menos special.
Tevreden kier avisa tur simpatizante di Partido MEP cu ta custumbra pa bay en grandi, pasobra esaki ta un dia di celebra pasobra tin 29 candidato cu ta deposita nan tempo, nan energia, nan capacidad, e tempo cu nan ta dedica na nan famia, pa dedica na pais Aruba.
Partido MEP tin e tradicion di haci e entrega di lista den un forma grandi, den un forma di celebracion. Un lista cu mester yuda dirigi nos pais den e tempo nos dilanti.
E biaha aki, segun Tevreden, temporada di pandemia ta exigi un cambio. Por a mira e 'front liners', manera enfermero, docter, specialistanan, trahando duro pa salba biba di esnan cu a wordo infecta pa e virus. Por a mira Cuerpo Policial trahando dia y anochi riba caya, pa mantene ordo pa e pais aki sigui bay dilanti. Pa prome biaha den historia Aruba mester a cera su fronteranan pa asina contene e virus.
Partido MEP kier evita pa tin plamamento di e virus y asina mas hende cu por yega den salanan di cuido intensivo y mas hende bira malo. Tevreden ta enfatiza cu e biaha aki no tin parada di auto, no tin un entrega cu un masa di hende, pa motibo di e pandemia. E ta haci un yamado pa tur simpatizante di Partido MEP pa atene nan mes na esaki. Nan por a scucha cu tin partido cu a scoge pa entrega lista di e forma aki, pero Partido MEP a scoge pa haci e entrega di un manera responsable. Despues di 25 di juni tur hende ta keda biba riba e pais aki y nan kier evita un aumento di contagio manera a tuma lugar na Corsow, na unda cu despues di eleccion e pais a bay plaat, ICU tabata yen y pashentnan mester a viaha bin Aruba pa haya cuido medico.
Partido MEP ta scoge pa salud y bienestar di pueblo, y progreso di poblacion. Nan ta contento di por a contene e pandemia, pasobra por mira cu varios otro pais a sufri y ainda ta sufriendo bao di e pandemia aki. Aruba a demostra e manera con pa atende e pandemia y esaki ta danki liderazgo di Prome Minister Evelyn Wever-Croes, ministernan di Gabinete Wever-Croes, como tambe tur departamento concerni.
