Parlamento tin derecho di pone reglanan y no a viola derecho democratico di señor Otmar Oduber

Presidente di Parlamento señor Marlon Sneek

ORANJESTAD (AAN): Presidente di Parlamento señor Marlon Sneek a elabora riba e caso di corte di señor Otmar Oduber kende recien a entrega su retiro como parlamentario. Presidente di Parlamento a bay bek na 2019, na unda cu e coalicion e tempo ey di MEP, POR y RED, unda cu e partido POR cu señor Oduber tawata lider, Parlamento a trata e regla di cas (huisregel) di Parlamento pa loke ta trata parlamentarionan cu ta bou un of otro sospecho no por representa Aruba den exterior. 

E tempo ey, Presidente di Parlamento Sneek a indica, señor Ricardo Croes di Partido RED no a bay di acuerdo cu e decision aki mientras cu Partido POR si a carga e inciativa aki. Despues a bin coalicion MEP-RAIZ, e punto a bolbe bin padilanti y a ratifica esaki. Y awo cu AVP-FUTURO e mesun punto a bin dilanti y un biaha mas a ser ratifica, dus un parlamentario sospechoso no mag di representa Parlamento di Aruba den exterior. E biaha aki, señor Oduber no tawata di acuerdo y a bay Corte na unda cu señor Oduber a exigi pa cada biaha e no por biaha, Parlamento mester pag’e 25 mil florin y tambe cu esaki ta un boycott cu ta strob’e di traha. 

Parlamento a ricibi e vonis di e caso aki na unda ta señala cu señor Oduber ta den eror y su derecho no a wordo viola. Presidente di Parlamento Sneek a agrega tambe e parti den e vonis cu ta bisa cu no tin un deficit den e parti democratico manera cu señor Oduber a expresa cu Parlamento ta strob’e di eherce su derecho democratico como parlamentario. 

“Señor Oduber por participa den tur reunion publico, e por entrega mocion y amienda. Esaki ta e trabou cu e parlamentario ta haci pa defende su comunidad. E vonis ta papia palabra cla. E ta un regla di Parlamento y Parlamento tin derecho di pone reglanan”, Presidente di Parlamento señor Marlon Sneek a expresa.