Otami Thomasia:
ORANJESTAD (AAN): Miembro di Parlamento pa AVP, Otami Thomasia, a expresa su preocupacion y desapunto riba e manera con oposicion iresponsabelmente ta maneha e debate tocante di e Rijkswet. Segun Thomasia, e situacion aki ta mustra un falta di consistencia den loke nan ta predica y un manipulacion di e sentimento di pueblo.
“Fraccion AVP a tuma e tempo pa analisa e proceso con Aruba a yega na un Rijkswet. Como un politico nobo, mi ta hopi desapunta di e manera iresponsabel cu oposicion ta hibando politica,” Thomasia a bisa.
E ta referi specificamente na ex-minister president, cu den su gobernacion a bay di acuerdo cu Conseho di Minister pa firma un bestuurlijk akkoord cu Hulanda pa cuminsa e proceso di un Rijkswet.
“Ta e mesun persona cu a firma y cu despues a yega bek Aruba y a instrui tres profesional pa elabora e proceso. Ta e mesun profesionalnan cu Gabinete AVP/FUTURO a sigui traha cu nan, y cu eventualmente a trece e concepto aki dilanti,” el a agrega.
Segun Thomasia, oposicion ta traha cu un dobel cara den Parlamento. “Nos semper a tende di nan cu mester respeta nos profesionalnan. Pero ora ta cumbini, e respet aki ta disparce. Esey no por ta. Nos mester ta consecuente ora nos ta evalua norma, balor y aporto di un persona.”
Fraccion AVP ta comprometi pa defende democracia, honra nos herencia y reconoce tur esunnan cu a sirbi y lucha pa pais. “Ta lamentabel cu malinformacion di oposicion ta crea miedo y emocion den pueblo, basa riba narativa falso. Pueblo ta merece claridad y transparencia, no manipulacion politico.”
Na e momento aki, a keda pa Parlamento analiza e obligacionnan cu ex-minister president a mara Aruba na dje. Pa Thomasia, un punto ta hopi cla: interes general di pueblo mester ta semper prioridad.
“Aruba mester move dilanti cu integridad y consistencia. AVP lo sigui pone pueblo prome, y lo sigui defende un proceso democratico cu ta basa riba respet, berdad y compromiso cu futuro di nos isla,” asina Parlamentario Thomasia ta conclui.
