ORANJESTAD (AAN): Diamars merdia sr. Mike Eman tabata tin un entrevista den prensa den cual e la troce asina hopi hechonan cu cualkier hende sano cu conoce e berdad,
lo sinti su cabes draai manera un tol. Segun Mike Eman, Hulanda a perde respet pa Aruba bao di e maneho di Minister Presidente Evelyn Wever-Croes.
A perde respet pasobra Gabinete Wever-Croes no ta mantene na palabracionnan haci. Mike Eman tin basta curashi pa declara esaki! Den e entrevista aki e la sinta gaba su mes y cuanto plan y sabiduria e ta pretende di tin. Net abo sr.Eman ta declara e cosnan aki? Acaso sr. Eman no por laga los di su mentiranan di old boys y ta kere cu pueblo di Aruba ta bobo? Acaso historia no a demostra kende bo ta di berdad?
Hulanda a perde confiansa den Mike Eman y a sa di demostra esaki:
(1) Hulanda a manda CAFT supervisa Mike Eman su maneho di finanzas publico desastroso di pais Aruba. Mike a hiba nos pais na rand di bancarota, y segun IMF, ARA y CAFT te cu casi 90% di nos GDP.
(2) Mike Eman a haya un KB pa su tremendo maneho? No! P’e disaster y deroche di placa, Plan BO Aruba, den cual 1.6 biyon no por a duna cuente pe! PPP Proyecto off balance y un extra 100 miyon na interes cu awe Aruba mester paga cu orguyo! Pakico bo ta kere Aruba tine asina dificil?
(3) Deficitnan record pa 8 aña largo, entre 180 miyon pa 445 miyon a crea un megadebe di 86.2% segun ARA y cu a haci cu Hulanda mester a cay aden y bisa; “no mas Mike, ta basta!”
(4) Pasobra Mike Eman no gusta traha cu rekensom, pesey awe pueblo mester sufri pasobra Aruba mester paga un debe cual Mike Eman a redobla, un interes cu Mike Eman a redobla, y un sufrimento den pueblo cu e la redobla. Hende no por come klinker Mike!
Hulanda ta desconfia den Mike Eman pa su mal maneho y corupcion
(1) Caso IBIS, cu Mike Eman kier lubida riba dje, a causa cu awe tin un ex minister cera na KIA.
(2) Caso Avestruz, cu Mike Eman a celebra su condena dilanti cas di partido AVP.
(3) Caso RDA, cu Mike Eman a wak Richard Arends core sali bai for di politica miyonario.
(4) Caso BO Aruba, den cual proyectonan traha na suma di 1.6 Biyon florin di pueblo, no tabata tin un backup pa e gastonan aki.
Candidato y Parlamentario di AVP ta desconfia di Mike Eman
un candidato a sali di partido AVP citando problemanan di corupcion, mentira y falta di principio den e partido. Asina dos otro parlamentario a sali di AVP exponiendo e fundeshi corupto y bergonzo di sr. Eman. Niun hende ta bai lubida nan palabranan Mike! Niun hende. E berdad a keda bisa, AVP su asientonan a bai di 7 pa 5 y ainda falta. Caya ta papia cu mas candidato a bai pero silenciosamente. Y awor bo kier pretende cu AVP so tin vision pa Aruba? Vision pa destruccion lo ta!
Aruba ta desconfia di Mike Eman
Mike ainda no ta “get the message.” Pueblo a mandabo di 13 pa 9 asiento, di 9 pa 7 asiento, y awor bo ta di 7 pa 5 asiento. Awor cu corupcion flaprante a asota e partido berde indicadornan ta mustra un descenso di 5 pa 3 asiento. Pueblo no ta confia y no ta kere mas den e lider cu a haci y deshaci. Un lider
cu a derocha, gasta, endeuda, bende nos autonomia, introduci CAFT, haya KB, a pone 100 miyon di interes pa aña extra riba lomba di pueblo, ta traha presupuesto cu Gobernador no kier a firma pasobra e tabata un presupuesto ficticio. Pueblo a wak e deroche di placa pa 3 fiesta pa un refineria cu nunca a habri, un energia Green cu b'a mercadea pero bo no a haci pe. Mester bisa mas, pasobra tin hopi mas!
E ideologia politico Cristian Democrata ta desconfia di Mike Eman
Manera sr. Ryçond Santos do Nascimento ta bisa; E nomber Cristian ni democrata no ta pas pa boso mas, pasobra AVP ta leu di esey. AVP y Mike Eman ta brasa y celebra corupcion, no kier para pa e berdad, ta hunga oportunismo cu mentira, ta gaña y tira colega bao bus, y no tin compromiso cu integridad. Esaki ta Mike Eman, esaki ta AVP, esaki ta e supuesto salbador di Aruba?
