Atacando autoridadnan ta mina principio democratico di e isla
ORANJESTAD (AAN): Partido MEP a tuma nota di atakenan cu Parlamentario Arthur Dowers ta haci contra nos autoridadnan. Esaki, pa Partido MEP ta inaceptabel y ta un actitud cu ta mina principio democratico di nos pais. Ora un ciudadano, especialmente den un posicion di parlamentario ta falta respet na nos autoridadnan, ta malo pa e fundeshi di nos pais. Mas ainda biniendo di un ex minister di husticia di nos pais, cu mester sa miho.
Mas di lamenta ainda ta cu señor Dowers di Fraccion di AVP ta ataca autoridad pa defende su colega Benny Sevinger, cu ta e corupto di mas grandi di nos pais. Esaki sigur ta bisa nada bon di e parlamentario aki. Dowers ta un Parlamentario di nos pais cu riba su mes ya caba a perde tur credibilidad di nos pueblo y su actitud di ataca autoridadnan di nos pais pa defende un miembro corupto di e Old Boys Club di AVP, ta haci pio ainda pa su persona cu no solamente a perde credibilidad di Aruba pero awo tambe a perde credibilidad di Hulanda. Tur loke esaki ta bisa di Dowers ta cu e ta mesun corupto of pio corupto cu su amigo corupto Benny Sevinger.
Parlamento, sigur Parlamentarionan di coalicion ta condena y rechasa e tipo di actuacionnan aki pasobra esaki ta un mal reflexion pa henter Parlamento y pa Aruba. Momento cu bo ataca autoridad, pa defende un corupto, bo ta cuminsa mina e principio democratico di bo pais.
Dowers ta bergonsa nos Parlamento y henter nos pais. Y pais completo mester rechasa e tipo di politica anticua di e Old Boys Cub aki. Partido MEP sigur y henter Aruba mester condena e actitud aki di Dowers y lag’e sinti cu di berdad loke e ta haci ta un berguensa pa nos pais.
